„მედიაჩეკერის” მონაცემებით, 2026 წლის I კვარტალში სარეკლამო შემოსავლებით ყველა ქართულ ტელეკომპანიაში ლიდერი სამთავრობო „იმედი” გახდა — 9,8 მილიონი ლარი. „რუსთავი 2” მეორე ადგილზეა 7,2 მლნ-ით, „პოსტვ” — მესამეზე 1,9 მლნ-ით.

„იმედის” სარეკლამო პარტნიორებს შორის გამოირჩევა სამი კომპანია, რომლებმაც თითოეულმა ნახევარ მილიონ ლარზე მეტი ჩარიცხა: „მეამა” (85%-ის მფლობელი ბიზნესმენი სულიკო ვარსემაშვილი), „ავენიუ ბაი ორბი” (კომპანია „ორბი ჯგუფი ბათუმი”) და „ანაგი” — კომპანია, რომლის დირექტორი ირაკლი გოგოლიშვილი 2023-2025 წლებში „ქართულ ოცნებას” 180 000 ლარი შეწირა.

საკომუნიკაციო კომისიის ინფორმაციით, 2026 წლის I კვარტალში ტელევიზიების სარეკლამო შემოსავლები წინა წელთან შედარებით 72,7%-ით გაიზარდა — სულ 25,6 მილიონი ლარი. შემოსავლების 87,4% პირდაპირი რეკლამიდან, 7,6% — პროდუქტის განთავსებიდან, ხოლო 4,9% — სპონსორობიდან მოდის.

შეგახსენებთ: 24 თებერვალს დიდმა ბრიტანეთმა „იმედი” და „პოსტვ” სამთავრობო პროპაგანდისტებად დასახელა და რუსეთის სანქციების რეჟიმის ფარგლებში დაასანქცირა. 25 თებერვალს პრემიერმა ირაკლი კობახიძემ კომერციულ კომპანიებს „იმედთან” თანამშრომლობის გაგრძელება მოუწოდა.