ჩეხეთში, კარლოვ ვარში, 24 მაისს დააკავეს რუსეთის მართლმადიდებლური ეკლესიის მიტროპოლიტი ილარიონი (ალფეევი) — სასულიერო პირი, რომელიც ცოტა ხნის წინ საქართველოს კათოლიკოს-პატრიარქ ილია II-ის დაკრძალვაზე რუსეთის დელეგაციის შემადგენლობაში იმყოფებოდა.

მღვდლის Telegram არხის ცნობით, პოლიციამ გააჩერა მანქანა, რომელშიც ილარიონი და მისი თანმხლები ოპერატორი მგზავრობდნენ. ჩხრეკის დროს ბარგის განყოფილებაში აღმოაჩინეს თეთრი ნივთიერების შემცველი ოთხი პატარა კონტეინერი.

„ნივთიერების შემადგენლობა, წარმომავლობა და ხასიათი მხოლოდ კომპეტენტურმა ექსპერტმა უნდა დაადგინოს. მიტროპოლიტი ილარიონი კატეგორიულად უარყოფს აკრძალული ნივთიერებების უკანონო შენახვაში რაიმე მონაწილეობას და ინციდენტს პროვოკაციად მიიჩნევს,” — ნათქვამია განცხადებაში.

ილარიონის ადვოკატმა, მიხალ პაკოვსკიმ, განაცხადა, რომ „მანქანის გაჩერებისა და შემდგომი ჩხრეკის გარემოებები სერიოზულ კითხვებს ბადებს”. თავად ილარიონმა განაცხადა: „მე არანაირი კავშირი არ მაქვს ნარკოტიკების უკანონო ვაჭრობასთან. ჩემთვის, როგორც სასულიერო პირისთვის, ასეთი ვარაუდი სრულიად მცდარია. მოვითხოვ სრულ, დამოუკიდებელ და პროცედურულად უნაკლო გამოძიებას.”

ჩეხური მედიის ცნობით, ილარიონი ხელმძღვანელობდა რუსეთის ეკლესიის ბუდაპეშტ-უნგრეთის ეპარქიას და უნგრეთის მოქალაქეობაც მიუღია. სტიქაროსანის მიერ სექსუალური შევიწროების ბრალდების შემდეგ იგი მღვდლად გადაიყვანეს კარლოვ-ვარის ეკლესიაში. 2025 წელს მედიაში გავრცელდა ინფორმაცია მისი ჩეხეთის ეროვნულ სანქციების სიაში შესაძლო შეყვანის შესახებ — სავარაუდო კავშირის გამო რუსეთის სადაზვერვო სამსახურებთან.