პატრიარქ კირილის განკარგულებით, ჩეხეთში ნარკოტიკების შენახვის ეჭვით 24 მაისს დაკავებული მიტროპოლიტი ილარიონი ბრაზილიაში გადაიყვანეს. მოსკოვის საპატრიარქოს 3 ივნისს გავრცელებულ განცხადებაში ნათქვამია, რომ ილარიონს „ობიექტური გარემოებების გამო” კარლოვი ვარიში, ჩეხეთის რესპუბლიკაში, მსახურება აღარ შეუძლია.

„თქვენ განსაზღვრული გაქვთ წმინდა მოციქულთა პეტრესა და პავლეს ეკლესია სანტა-როზაში, ბრაზილიაში და წმინდა მოციქულისა და მახარებლის, იოანე ღვთისმეტყველის ეკლესია კამპინა-დას-მისოინსში, ბრაზილიაში, სადაც უნდა იცხოვროთ,” — ვკითხულობთ პატრიარქ კირილის განკარგულებაში.

24 მაისს ჩეხეთის პოლიციამ მიტროპოლიტ ილარიონის მანქანა გაჩხრიკა და საბარგულში „ოთხი პატარა კონტეინერი” იპოვა, „რომელიც თეთრ ნივთიერებას შეიცავდა”. ჩეხეთის ნარკოტიკების კონტროლის ცენტრის თქმით, ჩხრეკამდე ანონიმური შეტყობინება მიიღეს. ორი დღის შემდეგ ილარიონი პატიმრობიდან გაათავისუფლეს ბრალდების წაუყენებლად, თუმცა გამოძიება გრძელდება. 30 მაისს მიტროპოლიტი რუსეთში დაბრუნდა.

ილარიონი (საერო სახელი — გრიგორი ალფეევი) ნარკოტიკების უკანონო შენახვაში მონაწილეობას უარყოფს და აცხადებს, რომ ბოლო თვეებში ანონიმური მუქარა მიიღო, კარლოვი ვარის ეპარქია რომ დაეტოვებინა. რუსეთის საგარეო საქმეთა სამინისტრომ ინციდენტი „დადგმულ პროვოკაციად” შეაფასა.

ილარიონი 2009-დან 2022 წლამდე მოსკოვის საპატრიარქოს საგარეო საეკლესიო ურთიერთობების დეპარტამენტს ხელმძღვანელობდა. 2022 წელს, უკრაინაში სრულმასშტაბიანი ომის დაწყების შემდეგ, იგი ბუდაპეშტ-უნგრეთის ეპარქიაში გადაიყვანეს. 2024 წელს კი კარლოვი ვარიში — მას შემდეგ, რაც ყოფილმა სტიქაროსანმა, გეორგი სუზუკიმ, ის სექსუალურ შევიწროებაში დაადანაშაულა.

ჩეხური და უნგრული მედია ადრეც ავრცელებდა ინფორმაციას ილარიონის სადაზვერვო სამსახურებთან კავშირებზე. გამოქვეყნდა ვიდეოც, სადაც ის FSB-ს თანამშრომლებთან ასოცირებული იარაღით სამიზნეს ესვრის.

ილარიონი ილია II-ის დაკრძალვაზე რუსეთის დელეგაციის შემადგენლობაში საქართველოშიც იმყოფებოდა.