კრუიზის ხომალდ Hondius-იდან ევაკუირებულ პირებს შორის ჰანტავირუსი სამ ადამიანს დაუდასტურდა — ერთ საფრანგეთისა და ორ აშშ-ის მოქალაქეს. ხომალდიდან ადამიანების ევაკუაცია 10 მაისიდან მიმდინარეობს, მას შემდეგ, რაც გემზე სამი მგზავრი ამ ვირუსით გარდაიცვალა.

საფრანგეთის მოქალაქე, რომელიც პარიზში გადაიყვანეს, მძიმე მდგომარეობაშია. საფრანგეთის ჯანდაცვის მინისტრის, სტეფანი რისტის ცნობით, ქალმა სიმპტომები კვირა ღამეს იგრძნო, ტესტმა დადებითი პასუხი განახა, ახლა ის სპეციალიზებულ ინფექციურ განყოფილებაში მკურნალობს. ნებრასკაში გადაყვანილ ამერიკელ პაციენტს ვირუსი ამ ეტაპზე უსიმპტომოდ მიუდის. კიდევ ერთ ადამიანს „მსუბუქი სიმპტომები” აღენიშნება.

ამერიკის ჯანდაცვის დეპარტამენტი ადასტურებს, რომ ამერიკელ პაციენტს „ანდების შტამი” — ჰანტავირუსის ის სახეობა, რომელიც ადამიანებს შორის ვრცელდება — დაუდასტურდა.

ორშაბათს გემზე დარჩენილი 54 ადამიანიდან ნაწილი ნიდერლანდებში სპეციალური რეისით გაემგზავრება. ამავე რეისით ავსტრალიელ მგზავრებსაც გამოიყვანენ — ტექნიკური მიზეზის გამო მათთვის განკუთვნილი თვითმფრინავი ტენერიფეზე ვერ ჩაფრინდა.

ჯანდაცვის მსოფლიო ორგანიზაციის ექსპერტი მარია ვან კერხოვე ხაზს უსვამს, რომ ყველა ინფიცირებულთან კონტაქტირებულ პირზე „აქტიური დაკვირვება” სავალდებულოა. საფრანგეთის მთავრობამ მოსახლეობა სიმშვიდისკენ მოუწოდა.