გემ Hondius-ზე ჰანტავირუსის გამო სამი ადამიანი გარდაიცვალა — ახლა კი ვირუსი ხომალდიდან ევაკუირებულ მგზავრებსაც მიაგნო. ვირუსი სამ ევაკუირებულ პასაჟირს დაუდასტურდა: ერთ საფრანგეთის და ორ აშშ-ის მოქალაქეს.

საფრანგეთის ჯანდაცვის მინისტრი სტეფანი რისტი ამბობს, რომ ფრანგი ქალი — ხუთ პასაჟირს შორის ერთ-ერთი, ვინც გასულ კვირას გემი დატოვა — კვირა ღამეს ცუდად გახდა, ტესტი დადებითი გამოვიდა, ხოლო ორშაბათს მისი მდგომარეობა გაუარესდა. ამჟამად ქალბატონი პარიზის კლინიკის სპეციალიზებულ ინფექციურ განყოფილებაში მკურნალობს.

აშშ-ის ჯანდაცვის დეპარტამენტის ცნობით, ნებრასკაში გადაყვანილ ამერიკელ პაციენტს „ანდების შტამი” — ჰანტავირუსის ერთადერთი სახეობა, რომელიც ადამიანებს შორის პირდაპირ გადადის — დაუდასტურდა. ამ ეტაპზე დაავადება უსიმპტომოდ მიმდინარეობს. კიდევ ერთ ევაკუირებულ მგზავრს „მსუბუქი სიმპტომები” აღენიშნება.

გემ Hondius-იდან მგზავრების ევაკუაცია 10 მაისს დაიწყო. ორშაბათს ხომალდზე 54 ადამიანი რჩებოდა — ნაწილი ნიდერლანდებში სპეციალური ჩარტერული რეისით გაემგზავრება. ავსტრალიელ პასაჟირებსაც ამავე რეისით გაიყვანენ: ტექნიკური ხარვეზის გამო მათთვის განკუთვნილი თვითმფრინავი ტენერიფეზე ვერ ჩაფრინდა.

საფრანგეთის მთავრობის წარმომადგენელმა მოდ ბრეგეონმა განაცხადა, რომ „ფრანგული ხელისუფლება ყველაფერს აკეთებს ფრანგი ხალხის დასაცავად” და მოსახლეობას სიმშვიდისკენ მოუწოდა.

ჯანდაცვის მსოფლიო ორგანიზაციის საფრთხეების პრევენციის დეპარტამენტის ხელმძღვანელი მარია ვან კერხოვე ამბობს, რომ ვირუსთან კონტაქტში შესული ყველა ადამიანისთვის „აქტიური მონიტორინგია” საჭირო.