ისრაელის თავდაცვის ძალებმა (IDF) დაადასტურეს ჰამასის სამხედრო ფრთის მეთაურის, იზ ად-დინ ალ-ჰადადის, მკვლელობა ღაზის სექტორში. ის „წერტილოვანი დარტყმით” პარასკევს ქალაქ ღაზის რაიონში მოკლეს.

ალ-ჰადადი 2023 წლის 7 ოქტომბრის ისრაელზე შეტევის ერთ-ერთი ორგანიზატორი იყო — იმ თავდასხმის შედეგად ათასზე მეტი ადამიანი დაიღუპა, 250-ზე მეტი მძევლად წაიყვანეს ღაზაში. 2025 წლის მაისში მუჰამედ სინვარის ლიკვიდირების შემდეგ ალ-ჰადადი ხელმძღვანელობდა ჰამასის სამხედრო ფრთას და პასუხისმგებელი იყო დაჯგუფების საბრძოლო შესაძლებლობების აღდგენასა და ახალი შეტევების მომზადებაზე.

IDF-ის ცნობით, ალ-ჰადადი ასევე ხელმძღვანელობდა ისრაელელი მძევლების დაკავების სისტემას და ადამიანების ცოცხალ ფარად გამოყენებაზე.

პარალელურად, ღაზის ერთ-ერთმა პალესტინელმა მაცხოვრებელმა ადვოკატების მეშვეობით სისხლის სამართლის საერთაშორისო სასამართლოს (ICC) მიმართა — ჰამასის მიერ ღაზის მოსახლეობის წინააღმდეგ ჩადენილი დანაშაულების გამოძიება და 14 ლიდერის, მათ შორის ალ-ჰადადის, დაპატიმრების ორდერი მოითხოვა. მიმართვა ჰამასს ადანაშაულებს მშვიდობიანი მოსახლეობის ცოცხალ ფარად გამოყენებაში, წამებასა და ბავშვების სამხედრო მიზნებისთვის გამოყენებაში.

Reuters-ისა და The Times of Israel-ის ცნობით, აშშ შეისწავლის შესაძლებლობას, ისრაელს სთხოვოს ღაზის სექტორის ომისშემდგომი რეკონსტრუქციის დასაფინანსებლად პალესტინის ავტონომიისთვის 5 მილიარდი დოლარის საგადასახადო შემოსავლის გადაცემა.