„კოალიცია ცვლილებისთვის” ლიდერებმა ნიკა გვარამიამ, ზურა ჯაფარიძემ და გიგა ლემონჯავამ 28 მაისს შეხვდნენ საქართველოში ვიზიტით მყოფ აშშ-ის სახელმწიფო დეპარტამენტის წარმომადგენლებს — პიტერ ანდრეოლსა და ჩარლზ იოქის.

შეხვედრის შემდეგ ზურა ჯაფარიძემ ჟურნალისტებს განუცხადა, რომ ვაშინგტონსა და „ქართულ ოცნებას” შორის ვითარების ნორმალიზებაზე საუბარი სრულად გამოირიცხა.

„იმაზე ლაპარაკი საერთოდ არ ყოფილა, რომ ვაშინგტონსა და ქართულ ოცნებას შორის რაღაც ნორმალიზება მოხდეს. საუბარი იყო, რა არის საქართველოს ინტერესები, ასევე ამ ქვეყანასა და ამ რეგიონში რა არის აშშ-ის ინტერესები და როგორ შეიძლება ამ ინტერესების ერთობლივი დამთხვევა. ამის წინაპირობაა, რომ ქვეყანაში უნდა იყოს დემოკრატია, დამოუკიდებელი სასამართლო, კანონის უზენაესობა”, — განაცხადა ჯაფარიძემ. მან ასევე შეახსენა, რომ ოდესღაც ამერიკული 10-წლიანი ვიზა ჩვეულებრივი რამ იყო, დღეს კი ერთჯერადი 1-თვიანი ვიზის მისაღებად 15 000 დოლარის ანაბარი სჭირდება.

ნიკა გვარამიამ ხაზი გაუსვა, რომ ამერიკის ინტერესი საქართველოში მხოლოდ ეკონომიკური არ არის — ის განისაზღვრება ქართველი ხალხის პოზიციით.

„შეუძლებელია გატარდეს დასავლური პოლიტიკური, ეკონომიკური ინტერესი იქ, სადაც რუსული ნება ხორციელდება. ამ ვიზიტზე ძალიან ნათლად გამოჩნდა, რომ ჩვენს პარტნიორებს კარგად ესმით ეს ამბავი. ქვეყანაში, სადაც ელემენტარულად სასამართლო არ არის, სადაც პოლიტიკური დესტაბილიზაცია ხელისუფლების მიერ მართული პოლიტიკური პატიმრების მეშვეობით — იქ არც ერთი ინვესტორი, მითუმეტეს ამერიკელი, არ შემოვა”, — თქვა გვარამიამ.

გიგა ლემონჯავამ გამოთქვა იმედი, რომ „ივანიშვილის რეჟიმზე წნეხი გაძლიერდება” და ხაზი გაუსვა, რომ ამერიკელ წარმომადგენლებს სრული ინფორმაცია აქვთ საქართველოში მიმდინარე პროცესების შესახებ.

„გამორიცხულია, რომ საერთაშორისო პარტნიორები ქართველი ხალხის ინტერესების ხარჯზე ივანიშვილის რეჟიმს დაეწყობოდნენ. მთავარია ჩვენი სტრატეგია — ფართომასშტაბიანი პროტესტი, საერთაშორისო წნეხის გაძლიერება და სანდო პოლიტიკური ალტერნატივის შექმნა. ეს მიგვიყვანს შედეგამდე: პოლიტიკური პატიმრების გათავისუფლება, დრაკონული კანონების გაუქმება და ახალი არჩევნების დანიშვნა”, — განაცხადა ლემონჯავამ.

დეპარტამენტის წარმომადგენლებმა ასევე შეხვდნენ პრემიერ-მინისტრ ირაკლი კობახიძეს, საგარეო საქმეთა მინისტრ მაკა ბოჭორიშვილს, ოპოზიციური პარტიების წარმომადგენლებს და საქართველოს 142-ე პატრიარქ შიო III-ს. ვიზიტი 29 მაისს დასრულდება.