ბრატისლავის სლოვანი 38 წლის ქართველ კაპიტანს, გურამ კაშიას ემშვიდობება. კლუბი სოციალურ ქსელში საუკეთესო მომენტების ვიდეოს აქვეყნებს — კაშია სეზონის დასრულებისთანავე გუნდს ტოვებს.

კლუბის ოფიციალური განცხადების თანახმად, გურამმა სლოვანში „ეპოქა შექმნა”: თითქმის 200 მატჩი ითამაშა ძირითად შემადგენლობაში, ხუთჯერ გახდა სლოვაკეთის ჩემპიონი, კლუბი ჩემპიონთა ლიგის საკვალიფიკაციო ეტაპზე გაიყვანა და კონფერენს ლიგის 1/8 ფინალამდე მიაღწია.

„ჩვენ სამუდამოდ მისი მადლიერები ვართ — ის ყოველთვის ბოლომდე იხარჯებოდა გუნდისთვის, როგორც მოედანზე, ისე მოედნის მიღმა. გურამმა თავად გადაწყვიტა, წასვლის დრო დადგა. ჩვენი კარი მისთვის მუდამ ღიაა,” — განაცხადა კლუბის გენერალურმა დირექტორმა, იან კმოტრიკმა.

„აქ დიდებული პერიოდი გავატარე. როცა ჩამოვედი, ვერ წარმოვიდგენდი, რომ ხუთჯერ გავხდებოდი ჩემპიონი და ჩემპიონთა ლიგაში ვითამაშებდი. ჩემი სლოვანში ყოფნა გამარჯვებებთანაა ასოცირებული. მივდივარ ამაყი,” — თქვა კაშიამ.

აღსანიშნავია, რომ სლოვანს ვლადიმირ ვაისიც ტოვებს — საქართველოს ეროვნული ნაკრების ყოფილი ასისტენტი სლოვაკეთის ეროვნულ გუნდში ბრუნდება.