27 მაისს გორის „კომბინატის დასახლებაში” გავრცელდა ვიდეოჩანაწერები, სადაც ჩანს, რომ პოლიციელები მოქალაქეს ფიზიკურად გაუსწორდნენ. 28 მაისს პროკურატურამ ექვსი პოლიციელი „სამსახურებრივი უფლებამოსილების ძალადობით გადამეტების” ბრალდებით დააკავა. თუმცა, სამოქალაქო საზოგადოება მიიჩნევს, რომ ეს კვალიფიკაცია მომხდარის სიმძიმეს არ ასახავს.

„საია”: კვალიფიკაცია არასწორია

„საქართველოს ახალგაზრდა იურისტთა ასოციაციის” (საია) თავმჯდომარე თამარ ონიანი პროკურატურას კვალიფიკაციის გადასინჯვას ითხოვს.

„კვალიფიკაცია ცალსახად არასწორია. ის საზოგადოებას გზავნილს აძლევს, თითქოს ნებისმიერი საპოლიციო მოქმედებისას ძალის გამოყენება ავტომატურად დასაშვებია. წამებას უნდა ერქვას თავისი სახელი — წამება. არაადამიანურ მოპყრობას — არაადამიანური მოპყრობა. სისხლის სამართლის კოდექსში ამ დანაშაულებისთვის ცალკე მუხლებია, რომლებზეც ხანდაზმულობის ვადა არ გამოიყენება, ანუ ისინი ბევრად უფრო მძიმე ქმედებებია,” — განაცხადა ონიანმა.

ზარქუა: ევროპაში სხვაგვარ შემთხვევებში საქმეც კი არ აღიძვრება

„ქართული ოცნების” მმართველ კოალიციაში მყოფ ირაკლი ზარქუას ეს ამბავი საქართველოს სრულ გამონაკლისად წარმოუდგენია.

„ჩვენ ვნახეთ ამ დღეებში ევროპის სხვადასხვა ქვეყანაში გადამეტებული ძალადობა პოლიციის მხრიდან მოქალაქეებზე, მაგრამ იქ არც საქმე აღძრულა და არც დაუკავებიათ. ამიტომ მნიშვნელოვანია, რომ საქართველოს ხელისუფლებამ მსგავს ქმედებაზე მყისიერი რეაგირება გაუკეთა,” — განაცხადა ზარქუამ.

„ოცნება”: პოლიტიკური პასუხისმგებლობა „შუაში” არ არის

„ოცნების” დეპუტატი ირაკლი ჭეიშვილი პოლიტიკური პასუხისმგებლობის საკითხს გვერდს უვლის.

„ერთ კონკრეტულ შემთხვევაზე როგორ შეიძლება პოლიტიკური პასუხისმგებლობის აღება? თუ იქნება გადაცდომა, შესაბამისად გამოიძიება. ერთი პოლიციელის დანაშაული ვერ იქნება პოლიტიკური პასუხისმგებლობა,” — თქვა ჭეიშვილმა.

„ოცნების” კიდევ ერთი წევრი ზვიად შალამბერიძე კი ამ შეფასებას ამყარებს: „პოლიტიკური პასუხისმგებლობა შუაში არ არის. პრემიერმინისტრმა გუშინ განაცხადი გააკეთა — ეს საკმარისია.”