გორის კომბინატის დასახლებაში ჩაწერილ ვიდეოში ჩანს, თუ როგორ ძალადობს ფიზიკურად ათამდე სამართალდამცავი კაცზე, რომელიც მიწაზე მწოლიარე, განეიტრალებული იყო და პოლიციას წინააღმდეგობას არ უწევდა.

„საგამოძიებო მოქმედებები მიმდინარეობდა… ცივი იარაღი ჰქონდა” — ამ სიტყვებით უპასუხა პოლიციელმა „ფორმულის” ჟურნალისტს, რომელმაც შეეკითხა, რატომ ჰქონდა ადგილი ძალადობას.

ვიდეო „ქართლის ამბებმა” გაავრცელა; „ფორმულამ” კი სოციალურ ქსელში გამოაქვეყნა. კადრებით ირკვევა, რომ სამართალდამცავები კაცს გაუსწორდნენ მას შემდეგ, რაც იგი უკვე მიწაზე დაჩოქილი, განეიტრალებული იყო.

საქართველოს პროკურატურამ სისხლის სამართლის კოდექსის 333-ე მუხლის მე-3 ნაწილის „ბ” ქვეპუნქტით — ძალადობით უფლებამოსილების სავარაუდო გადამეტების ფაქტზე — გამოძიება დაიწყო. „ამ ეტაპზე მიმდინარეობს გადაუდებელი საგამოძიებო და საპროცესო მოქმედებები,” — ნათქვამია პროკურატურის განცხადებაში.