ჟენევის საერთაშორისო მოლაპარაკებებში ოსური მხარის დელეგაციის ხელმძღვანელმა, კონსტანტინ კოჩიევმა, თანათავმჯდომარეებთან შეხვედრაზე განაცხადა, რომ ოკუპირებულ ცხინვალს „ძალიან აღელვებს” საქართველოში ჯაშუშობის ბრალდებით დაკავებული 27 წლის თამაზ გოლოევის ბედი.

„გაიტაცეს სტუდენტი თამაზ გოლოევი, რომელიც მეზობელ სახელმწიფოში თავის საქმეზე იყო გასული. ეს ძალიანუარყოფითი სიგნალია ჩვენი პროცესისთვის, კავკასიაში უსაფრთხოებისა და სტაბილურობის შესახებ დისკუსიისთვის,” — თქვა კოჩიევმა.

სუსმა გოლოევი 22 აპრილს დააკავა მას შემდეგ, რაც ახალგაზრდამ 21 აპრილს საკონტროლო-გამშვები პუნქტი „რაზდახანი” გადაკვეთა. სუსის განცხადებით, გოლოევი „გადაიბირა უცხო ქვეყნის სპეცსამსახურმა” — სახელმწიფო კი მოლაპარაკება. სახელისუფლებო ტელეკომპანიებმა რუსეთზე მიანიშნეს, თუმცა სუსი ჯერ ქვეყნის სახელს არ ასახელებს. 24 აპრილს სასამართლომ დაპატიმრება შეუფარდა.

გოლოევი ახალგორელია, ოსი მამისა და ქართველი დედის შვილი. ის ცხინვალში სწავლობდა და ხშირად ჩადიოდა თბილისში. საქართველოს მოქალაქეა, ამავდროულად, ე.წ. „სამხრეთ ოსეთის” პასპორტიც ჰქონია. ოსური მხარე ბრალდებებს „მოგონილ საბაბს” და „პროვოკაციას” უწოდებს.

ცხინვალი მოითხოვს გოლოევის გათავისუფლებასა და „სამშობლოში დაბრუნებას”. ე.წ. „სამხრეთ ოსეთის” ადმინისტრაციამ EUMM-ის „ცხელი ხაზის” მეშვეობით ქართულ მხარეს კითხვები გაუგზავნა. პასუხი მიეცა მხოლოდ ჯანმრთელობის შეფასებაზე — „ნორმალური” — ხოლო სტატუსსა და წითელი ჯვრის ვიზიტთან დაკავშირებული კითხვები უპასუხოდ დარჩა. გოლოევის დედამ შვილთან შეხვედრა ჯერ ვერ შეძლო, თუმცა ადვოკატი ჰყავს. რადიო თავისუფლებამ ვერ გაარკვია, ვინ არის ეს ადვოკატი.

გოლოევს 8-დან 12 წლამდე პატიმრობა ემუქრება.