გია გაჩეჩილაძე, მომღერალი და გადაცემა „უცნობის კიდობანის“ წამყვანი, „მაესტროს“ 80%-იანი წილის მფლობელი გახდა. ინფორმაციას “მედიაჩეკერი” ავრცელებს.

საჯარო რეესტრის მონაცემებით, გაჩეჩილაძეს ბრიტანეთის მიერ სანქცირებული „იმედის“ ყოფილ მფლობელთან, ირაკლი რუხაძესთან დაკავშირებულმა „მედია ფაინენს გრუპ ბი.ვი“-მა საკუთარი 25%-იანი წილი უსასყიდლოდ გადასცა. მანამდე გია გაჩეჩილაძე „სტუდია მაესტროს“ 55%-იან წილს ფლობდა.

წილების გადაცემის შემდეგ, მოსალოდნელია თუ არა ტელეკომპანიაში რაიმე სახის ცვლილება - ამ კითხვებზე საპასუხოდ გია გაჩეჩილაძესთან დაკავშირებას რედაქცია დილიდან უშედეგოდ ცდილობს. „მაესტროს“ დირექტორმა, ზურა ნაყეურმა კი გვითხრა, რომ ამასთან დაკავშირებით არანაირ ინფორმაციას არ ფლობს.

ბოლო ცვლილებით, შპს „სტუდია მაესტროს“ წილები ასე ნაწილდება:გიორგი გაჩეჩილაძე - 80%; მამუკა ღლონტი - 15%; ეკატერინე აკობია - 5%;კომპანიის დირექტორი კი ზურაბ ნაყეურია.