14-15 მაისს მოლდოვაში გამართულ ევროპის საბჭოს მინისტრთა კომიტეტის სხდომაზე საქართველომ უარი განაცხადა ინიციატივაზე, შეუერთდეს სპეციალური ტრიბუნალის შექმნას, რომელიც უკრაინის წინააღმდეგ რუსეთის აგრესიის დანაშაულს გამოიძიებს.

ინიციატივას 34 ევროპული სახელმწიფო შეუერთდა — ევროკავშირის სრულწევრი ქვეყნების უმეტესობა, ასევე ავსტრალია, კოსტა-რიკა და ევროკავშირი, როგორც ორგანიზაცია. ევროპის საბჭოს გენერალური მდივნის ალან ბერსეს სიტყვებით, „სამართლიანობამ უნდა იზეიმოს.”

„ქართული ოცნების” საგარეო საქმეთა მინისტრი მაკა ბოჭორიშვილი ამ გადაწყვეტილებას სიფრთხილით ხსნის: „ევროკავშირის წევრი ქვეყნების დამოკიდებულება არ გვაძლევს იმის ფუფუნებას, მივიღოთ ისეთი გადაწყვეტილებები, რომლებიც დამატებით რისკებსა და საფრთხეებს შეუქმნის ჩვენს ქვეყანას.”

საქართველოსთან ერთად ინიციატივას არ შეუერთდნენ ალბანეთი, სომხეთი, აზერბაიჯანი, ბოსნია და ჰერცეგოვინა, ბულგარეთი, უნგრეთი, მალტა, ჩრდილოეთ მაკედონია, სერბეთი, სლოვაკეთი და თურქეთი.