„ლელო — ძლიერი საქართველოს” ლიდერმა გრიგოლ გეგელიამ განაცხადა, რომ პრემიერ-მინისტრ ირაკლი კობახიძის პოლიტიკური მომავალი კითხვის ნიშნის ქვეშ დგას: „ივანიშვილს აქვს მორიგი პარანოიული შემოტევა — კობახიძის დღეები დათვლილია.”

გეგელიის შეფასებით, „ქართული ოცნების” ხელისუფლება ვერ ახერხებს ვაშინგტონთან ურთიერთობის ნორმალიზებას, ივანიშვილს კი ვეღარ ატყუებენ, რომ ყველაფერი კარგად წავა. ამ ჩიხის ნიშნად ის სახავს პრემიერის ბოლო ბრიფინგს, სადაც კობახიძემ 7 წუთში ოთხჯერ ახსენა ივანიშვილი: „ეს არის აბსოლუტურად „ქოცური” ხელწერა — ივანიშვილის ასვლა-ლოცვა, ეს ყველა ჩვენ გვახსოვს.”

გეგელია ასევე 11 ივნისსა და ევროკავშირის უვიზო რეჟიმის განხილვას უკავშირებს ოპოზიციის ლიდერებზე „საბოტაჟის საქმის” გახსენებას: „ზუსტად ამ კრიტიკული სხდომის დღეს გადმოწიეს საქმე, რომელიც პრაქტიკულად ყველა ოპოზიციურ ლიდერს ერთბაშად ასამართლებს.”

ოპოზიციონერის თქმით, ამერიკასთან სტაბილიზაციის მცდელობა „ქართული ოცნებისთვის” სულ უფრო შორეული ხდება: „ვხედავთ კიდევ ერთ წრეს — ვერც ამერიკასთან „დალაგება” ხდება, ვერც ივანიშვილი ტყუვდება.”