14 მაისს გარდაბანში BMW-ის მარკის ავტომობილი ხეს შეეჯახა — ადგილზე 7 ადამიანი დაიღუპა. რუსთავის ცენტრალური საავადმყოფოს დირექტორ პაპუნა ბახტაძის ინფორმაციით, 22 წლის ხანოღლან ნასიბოვი — ინციდენტის მე-8 დაშავებული — ოპერაციის შემდეგ საღამოს გარდაიცვალა. „ჩაუტარდა ქირურგიული ჩარევა, ოპერაცია, შესაბამისი პროცედურები გაგრძელდა ტრავმატოლოგიაში”, — განაცხადა ბახტაძემ.

შინაგან საქმეთა სამინისტრომ გამოძიება სისხლის სამართლის კოდექსის 276-ე მუხლის მე-8 ნაწილით — სატრანსპორტო საშუალების ექსპლუატაციის წესის დარღვევა სიკვდილით გათავებული შედეგით — დაიწყო.

ყოფილმა პრეზიდენტმა მიხეილ სააკაშვილმა სოციალური ქსელის გვერდიდან ამ ტრაგედიაზე საპასუხოდ განაცხადა: „ყველა ამბობს, რომ პატრულები არამხოლოდ არ ცდილობენ ასეთი მანქანების შეჩერებას, არამედ თვალს ხუჭავენ მაღალ სიჩქარეზე — იმიტომ, რომ აწყობთ, რაც შეიძლება მეტი ხალხი დაიჯარიმონ კამერების მეშვეობით, ქოც-მოხელეებს პრემიები დაუგროვონ”.

ადგილობრივების ინფორმაციით, ავტომობილი ავარიის დროს მაღალი სიჩქარით მოძრაობდა.