განათლების, მეცნიერებისა და ახალგაზრდობის სამინისტრო 1 801 000 სასკოლო ფორმის შესყიდვაზე ახალ ბაზრის კვლევას აცხადებს. წინა კვლევაში (3 აპრილი) ყველაზე დაბალი ფასის შემოთავაზებულმა კომპანიამ სატენდერო მოთხოვნები ვერ დააკმაყოფილა და 14 მაისს მონაწილეობაზე უარი განაცხადა.

2026 წლის 5 თებერვლის კანონცვლილების საფუძველზე 2026–2027 სასწავლო წლიდან საჯარო სკოლის 1-6 კლასების მოსწავლეებისთვის ფორმის ტარება სავალდებულო გახდა. ფორმების ესკიზები ამ წლის აპრილში გახდა ცნობილი.

შესასყიდი ნივთების სია: 292 000 გოგონას პიჯაკი, 308 000 ბიჭის პიჯაკი, 438 000 გოგონას შარვალი, 616 000 ბიჭის შარვალი, 146 000 მოკლე ქვედაკაბა და 1 000 გრძელი ქვედაკაბა. „რადიო თავისუფლების” ცნობით, ადრინდელ კვლევაში ამ შესყიდვის სავარაუდო ღირებულება 44,9 მილიონ ლარს შეადგენდა.