2026 წელი საქართველოსთვის ამინდის სიუჩვეულობით გამოირჩევა: იანვარში თბილისში 41-საათიანი თოვა — ყველა სადგურის ისტორიაში უპრეცედენტო; თებერვალში ორ დღეში თვის ნორმაზე ხუთ-ექვსჯერ მეტი ნალექი; ცივი მარტი, არამდგრადი აპრილი — და ახლა ასეთივე მაისი. გარემოს ეროვნული სააგენტოს მეტეოროლოგი თამარ პაპაშვილი ამ ფენომენს ხსნის.

— რა განაპირობა ამ ნალექების მოჭარბებას?

— იანვრიდან მოყოლებული, მაისის პირველი ნახევრის ჩათვლით, ქვეყანაში ძირითადად არამდგრადი ამინდები ნარჩუნდება. ამ ყველაფრის უკან ორი ძირითადი პროცესია: ჩრდილო-დასავლეთიდან ცივი და ნოტიო ჰაერის მასების ხშირი შემოჭრა და ხმელთაშუა ზღვის ციკლონების გაქტიურება.

ამ ციკლონური გარემოს შექმნაში მთავარი როლი ეკუთვნის „ჭავლურ დენებს” — ტროპოსფეროს ზედა ნაწილში, 10 კილომეტრის სიმაღლეზე მოქმედ ძლიერ ქარებს. სუსტი ჭავლური დენი ნიშნავს, რომ პოლარული სიცივე „იღვრება” ქვედა განედებისკენ. წელს სწორედ ეს მოხდა — ამ ქარების პერიოდულმა შესუსტებამ ცივი მასების სამხრეთისკენ გადმოსვლა გამოიწვია, და ეს ფართომასშტაბიანი მოვლენა ჩრდილოეთ ნახევარსფეროს დიდ ნაწილს შეეხო.

— მარტი, აპრილი, მაისი — ეს ყველაფერი ანომალიაა?

— თბილისისთვის წლევანდელი მაჩვენებლები მართლაც შოკისმომგვრელია. ბარში, ყვავილობის ფონზე, გვიანი თოვლი — ეს ანომალიად იქნება აღქმული ყოველთვის. მიუხედავად ამისა, მაისის პირველი ნახევარი ყოველთვის ხასიათდება გარკვეული არამდგრადობით. 18 მაისიდან კი შედარებით სტაბილური პერიოდი გველოდება — განსაკუთრებით აღმოსავლეთ საქართველოში, სადაც ტემპერატურა მოიმატებს და მეტი მზიანი დღე გვეგულება.

— ხალხური ამინდის პროგნოზებს რა ეტყვით?

— ეს ძალიან საინტერესო თემაა. ადამიანები, რომლებსაც არ ჰქონდათ წვდომა პროგნოზებზე, ადევნებდნენ თვალს ღრუბლების ფორმას, ფერს, ქარის მიმართულებას. მაგალითად, ცა რომ ე.წ. ცირუსული ღრუბლებით დაიფარება, ეს ხშირად ატმოსფერული ფრონტის მოახლოების ნიშანია. ხალხური დაკვირვებები ფიზიკური საფუძვლის მოკლებული ნამდვილად არ არის — ეს ბუნებრივ მოვლენებზე საუკუნოვანი გამოცდილებაა.