ოკუპირებული აფხაზეთის დე ფაქტო „გენერალური პროკურატურის” ცნობით, გალის სასამართლომ საქართველოს მოქალაქე გიორგი ცატავა „სახელმწიფო საზღვრის უკანონო გადაკვეთაში” დამნაშავედ ცნო და ერთი წლით თავისუფლების აღკვეთა მიუსაჯა. განაჩენი 19 მაისს მოსამართლე კ.ნ. ლასურიამ გამოიტანა.

დე ფაქტო უწყების ინფორმაციით, ცატავა თბილისის მიერ კონტროლირებადი ტერიტორიიდან მდინარე ენგურის გავლით 2025 წლის 12 აგვისტოს გადავიდა. 2026 წლის 15 აპრილს დააკავეს და გალის დროებითი დაკავების იზოლატორში მოათავსეს.

საქართველოს სახელმწიფო უსაფრთხოების სამსახურს (სუს) ამ ფაქტის შესახებ კომენტარი ჯერ არ გაუკეთებია.

სუსის 2025 წლის ყოველწლიური ანგარიშის მიხედვით, ოკუპირებულ აფხაზეთში მოქალაქეთა უკანონო დაკავების 40 შემთხვევა დაფიქსირდა. 2025 წლის ბოლოსთვის ოკუპირებულ ტერიტორიებზე უკანონო პატიმრობაში 15 ქართველი მოქალაქე იმყოფებოდა.