ფიტნეს ცენტრ „რეფორმერის” დამფუძნებელი გიორგი ფუტკარაძე აცხადებს, რომ სახელმწიფოს კანონს — მეწარმე იურიდიული პირისთვის პოლიტიკური აქტივობის შემზღუდველ ნორმებს — საქართველოს საკონსტიტუციო სასამართლოში გაასაჩივრებს.

2026 წლის 4 მარტს ადმინისტრაციულ სამართალდარღვევათა კოდექსს 153¹³-ე, ხოლო სისხლის სამართლის კოდექსს 355³-ე მუხლი დაემატა. ნორმები კრძალავს მეწარმე სუბიექტებს, ახდენდნენ „გავლენას” ხელისუფლებაზე, სახელმწიფო დაწესებულებებზე ან ქვეყნის შიდა თუ საგარეო პოლიტიკაზე. კანონის დარღვევა კომპანიის ლიკვიდაციასა და მეწარმის პატიმრობას ითვალისწინებს.

ფუტკარაძე ამ ნორმებს კონსტიტუციის საწინააღმდეგოდ მიიჩნევს: „ბიზნესი, ქვეყნის ეკონომიკის ხერხემალი, გარდა მოგებაზე ორიენტირებული საქმიანობისა, ვალდებულია აქტიურად მონაწილეობდეს დემოკრატიულ პროცესებში.”

მისი შეფასებით, კანონის ბუნდოვანება სამართალდამცველებს „შეუზღუდავ ბერკეტს” აძლევს ნებისმიერი ბიზნესის მიმართ შერჩევითი სადამსჯელო ღონისძიებების გასატარებლად. ფუტკარაძე კოლეგებს, ბიზნეს-ასოციაციებსა და სამოქალაქო საზოგადოებას ამ სარჩელის გარშემო გაერთიანებისკენ მოუწოდებს.