შინაგან საქმეთა სამინისტრომ ფოთის რკინიგზის სადგურზე ერთი პირი დააკავა, რომელიც მატარებლის ვაგონის ავზიდან ფარულად ჩამონტაჟებული მილის მეშვეობით 3 000-მდე ლიტრ საწვავს იპარავდა.

სამეგრელო-ზემო სვანეთის პოლიციის ფოთის საქალაქო სამმართველოს თანამშრომლებმა ბრალდებული დიდი ოდენობით ჩადენილი ქურდობის ბრალდებით დააკავეს. გამოძიებით დადგინდა, რომ ბრალდებული ავზიდან ფარული მილის გამოყენებით 3 000-მდე ლიტრ საწვავს უკანონოდ ეუფლებოდა. პოლიციამ ნაქურდალი საწვავი ნივთმტკიცებად ამოიღო.

სამართალდამცველები სხვა სავარაუდო მონაწილეთა დადგენასა და დაკავებაზე აქტიურ საგამოძიებო ღონისძიებებს ახორციელებენ. გამოძიება სისხლის სამართლის კოდექსის 177-ე მუხლის მე-2 და მე-4 ნაწილებით მიმდინარეობს, რაც 10 წლამდე ვადით თავისუფლების აღკვეთას ითვალისწინებს.