სომხეთის პრემიერ-მინისტრმა ნიკოლ ფაშინიანმა პირობა დადო, რომ სახელმწიფო დაეხმარება რუსეთის მიერ ბოლო დროს დაწესებული შეზღუდვებით დაზარალებულ კომპანიებს. მან ეს განცხადება გეღარქუნიქის ოლქის სოფელ ლჭაშენის მაცხოვრებლებთან შეხვედრისას გააკეთა.

„მთავრობამ გადაწყვიტა, რომ ყველა შემთხვევაში, როდესაც ექსპორტისთვის უსამართლო ბარიერები წარმოიქმნება, განვახორციელებთ დახმარებისა და სუბსიდირების პროგრამებს, რათა ჩვენი ეკონომიკა არ დაზარალდეს,” — განაცხადა ფაშინიანმა. მან დააზუსტა, რომ ეს ეხება შემთხვევებს, სადაც ბარიერები პროდუქტის ხარისხს არ უკავშირდება.

ერევნის ევროკავშირთან დაახლოების განცხადებებისა და 7 ივნისის საპარლამენტო არჩევნების ფონზე, რუსეთი სომხეთზე პოლიტიკური და ეკონომიკური ზეწოლის ტაქტიკას მიმართავს. მოსკოვმა აკრძალა სომხეთიდან ყვავილების, პომიდვრის, კიტრის, წიწაკის, მწვანილის, მარწყვის, ალუბლის, გარგარის, ქლიავის, ატმის, ვაშლატამასა და ყურძნის იმპორტი. შეზღუდვები ასევე დაწესდა თევზსა და ალკოჰოლურ სასმელებზე.