ევროსაბჭოს მინისტრთა კომიტეტმა 12 ივნისს გამოქვეყნებულ გადაწყვეტილებაში საქართველოს ხელისუფლებას მოუწოდა, „საფუძვლიანად გადახედოს” შეკრების თავისუფლებასთან დაკავშირებულ კანონმდებლობასა და პრაქტიკას და შეუსაბამოს ისინი ადამიანის უფლებათა ევროპული კონვენციის სტანდარტებს.

კომიტეტი „ღრმა შეშფოთებით” მიუთითებს საკანონმდებლო ზომებზე, „რომლებსაც მსუსხავი ეფექტი აქვს შეკრების თავისუფლებაზე”, და ხაზს უსვამს, რომ „ნებისმიერი ჩარევა შეკრების თავისუფლებაში უნდა შეესაბამებოდეს კანონიერების, აუცილებლობისა და პროპორციულობის პრინციპებს”.

ხელისუფლებას მოუწოდა, თავიდან აიცილოს „არაპროპორციული და თვითნებური ადმინისტრაციული დაკავება, გამამტყუნებელი განაჩენები და გადაჭარბებული ფინანსური სანქციები” — ისეთები, როგორიც სტრასბურგის სასამართლომ 2022–2025 წლებში განხილულ ქართულ საქმეებში დააფიქსირა.

კომიტეტი ასევე მოუწოდებს, „ხელი შეუწყოს სამოქალაქო საზოგადოების ორგანიზაციების ეფექტურ ფუნქციონირებას” — ამ ორგანიზაციებს ქართული ხელისუფლება „გლობალური ომის პარტიის მარიონეტებს” უწოდებს — და ჩაერთოს კონსულტაციებში დაინტერესებულ მხარეებთან, მათ შორის ვენეციის კომისიასთან.

გადაწყვეტილება მიიღეს „მაქარაშვილი და სხვები საქართველოს წინააღმდეგ” სასამართლო საქმეთა ჯგუფის აღსრულების ზედამხედველობის ფარგლებში, 9–11 ივნისს გამართული შეხვედრების შემდეგ. მინისტრების შეხვედრა ჯგუფის განხილვის განახლებისთვის 2027 წლის ივნისამდეა დაგეგმილი.