ევროპის საბჭოს ლოზანის უნივერსიტეტთან ერთობლივი 2025 წლის ანგარიშის თანახმად, საქართველო 100 000 მოსახლეზე 232 პატიმრით ევროპაში მეოთხე ადგილს იკავებს. მხოლოდ თურქეთი (458), აზერბაიჯანი (271) და მოლდოვა (245) ასრულებენ უფრო მაღალ პოზიციებს. ანგარიშის შეფასებით, საქართველოს მაჩვენებელი „ძალიან მაღალია” ევროპის ინდექსით.

ამავდროულად, 2024-2025 წლებში საქართველო იმ 6 ქვეყანას შორისაა — უკრაინა, სლოვაკეთი, ალბანეთი, ესტონეთი, პოლონეთი — სადაც პატიმრობის მაჩვენებელი „მნიშვნელოვნად შემცირდა”. საქართველოში 11%-იანი კლება დაფიქსირდა — ეს ჩამოთვლილ ქვეყნებს შორის ყველაზე დიდი კლებაა.

საქსტატის ცალკე მონაცემებით, 2025 წელს 22 767 ადამიანი გასამართლდა — 2001 წლის შემდეგ ყველაზე მეტი. 2024 წელთან შედარებით ეს 6 000-ით მეტია. 2025 წელს მსჯავრდებულთა 50.1%-მა პირობითი მსჯავრი მიიღო, 24.4%-ს თავისუფლება აღეკვეთა, 20.2%-ს ჯარიმა დაეკისრა.

2025 წლის ბოლოს ციხეებში 11 153 პატიმარი იყო — 2012 წლიდან ყველაზე მეტი. ევროპის საბჭოს ანგარიში ასევე აღნიშნავს, რომ საქართველოს მონაცემები ოკუპირებული ტერიტორიების — სამხრეთ ოსეთისა და აფხაზეთის — ციხეებს არ მოიცავს.