ევროპარლამენტის საგარეო საქმეთა კომიტეტმა (AFET) 5 მაისს 53 ხმით 14-ის წინააღმდეგ (2 თავი შეიკავა) მხარი დაუჭირა კრიტიკულ ანგარიშს საქართველოს შესახებ. ლიეტუველი ევროპარლამენტარის რასა იუკნევიჩიენეს მიერ მომზადებული დოკუმენტი ევროკომისიის 2025 წლის ანგარიშს ეყრდნობა. იგი პლენარულ სხდომაზე მომდევნო თვეებში განიხილება.

ანგარიში ყურადღებას ამახვილებს „ძირითად შეშფოთებებზე საქართველოს დემოკრატიის, კანონის უზენაესობისა და ევროპული ინტეგრაციის მდგომარეობასთან დაკავშირებით” — კანდიდატის სტატუსის მისაღებად საჭირო ცხრავე პრიორიტეტის შესრულებაში უკუსვლა შეინიშნებაო. „ქართულ ოცნებას” ევროკავშირისა და მისი დიპლომატების წინააღმდეგ „ორკესტრირებულ კამპანიასა” და „დეზინფორმაციაში” ადანაშაულებს. ასევე ახსენებს „სულ უფრო რეპრესიულ კანონმდებლობას”, მათ შორის გრანტების კანონში ბოლო ცვლილებებს, და „ქართული ოცნების” ლიდერებზე, მათ შორის ბიძინა ივანიშვილზე, მიზნობრივ სანქციებს ითხოვს.

საქართველოს საგარეო საქმეთა სამინისტრომ კენჭისყრიდან რამდენიმე საათში ანგარიში „ფაქტების მიზანმიმართული დამახინჯებით” შექმნილ დოკუმენტად დაახასიათა, რომელიც „ევროპარლამენტის რეპუტაციას ზიანს აყენებს”. სამინისტრომ ასევე „შემაშფოთებლად” მიიჩნია ევროკავშირის ინსტიტუტების „საქართველოს მართლმადიდებელ ეკლესიაზე მიზანმიმართული თავდასხმისთვის” გამოყენება.