436 ხმით 145-ის წინააღმდეგ – ევროპარლამენტმა საქართველოზე მორიგი კრიტიკული რეზოლუცია და ანგარიში მიიღო. რეზოლუციის მომხსენებელი ლიეტუველი ევროპარლამენტარი რასა იუკნევიჩიანეა. ევროკომისიის მიერ გავრცელებულ პრესრელიზში ნათქვამია, რომ რეზოლუცია სრულ სოლიდარობას გამოხატავს ქართველი ხალხის მიმართ, რომლებიც დემოკრატიული უკუქცევის ფონზე აგრძელებენ ბრძოლას ევროპული და დემოკრატიული საქართველოსთვის. თუმცა, ანგარიში ინარჩუნებს პარლამენტის წინა პოზიციას საქართველოს პარლამენტისა და მის მიერ დანიშნული პრეზიდენტის ლეგიტიმურობის არაღიარებასთან დაკავშირებით. “საქართველოში დემოკრატიული უკუქცევის სერიოზული გაგრძელების გათვალისწინებით, ევროპარლამენტარები სინანულს გამოთქვამენ, რომ მმართველმა პარტია ქართულმა ოცნებამ არანაირი ნაბიჯი არ გადადგა ნეგატიური ტენდენციების შესაჩერებლად. ანგარიშში ხაზგასმულია, რომ ევროკავშირისა და წევრი სახელმწიფოების საქართველოს ხელისუფლებასთან ჩართულობით მკაცრად უნდა იყოს შესამჩნევი დემოკრატიული უკუსვლის, შეზღუდვებისა და ევროკავშირის საწინააღმდეგო რუსული სტილის დეზინფორმაციის კურსის შესაჩერებლად ხელშესახები და ნაბიჯების გადადგმა”, — წერს ევროკომისია. რეზოლუციის მომხსენებლის, რასა იუკნევიჩიენეს თქმით, უნდა გადავიდეთ კოორდინირებულ, ევროკავშირის მასშტაბით სანქციების დაწესებაზე იმ პირების წინააღმდეგ, რომლებიც პასუხისმგებელნი არიან რეპრესიებსა და სახელმწიფოს ხელში ჩაგდებაზე. “ქართული ოცნების რეჟიმი აგრძელებს დემოკრატიული ინსტიტუტების დაშლას, დამოუკიდებელი მედიის გაჩუმებას და რეგიონში ერთ-ერთი ყველაზე მეტი პოლიტიკური პატიმრის, მათ შორის სახაროვის პრემიის ლაურეატის, მზია ამაღლობელის, დაკავებას. ეს მიუღებელია ევროკავშირის კანდიდატი ქვეყნისთვის. ახლა ჩვენ უნდა გადავიდეთ კოორდინირებული ევროკავშირის მასშტაბით სანქციების დაწესებაზე იმ პირების წინააღმდეგ, რომლებიც პასუხისმგებელნი არიან რეპრესიებსა და სახელმწიფოს ხელში ჩაგდებაზე”, — განაცხადა მომხსენებელმა რასა იუკნევიჩიენემ. ამასთან ერთად, “რეზოლუცია მკაცრად გმობს ქართული ოცნების მოკავშირე მედია საშუალებების, მათ შორის “იმედის”, “პოსტვ”-სა და “რუსთავი 2”-ის როლს ევროკავშირისა და მისი ინსტიტუტებისა და წარმომადგენლების, კერძოდ, საქართველოში ევროკავშირის დელეგაციის ხელმძღვანელისა და ევროკავშირის წევრი სახელმწიფოების დიპლომატების წინააღმდეგ სისტემატური დეზინფორმაციის, ცილისმწამებლური კამპანიებისა და მტრული პროპაგანდის გავრცელებაში; აღნიშნავს გაერთიანებული სამეფოს მიერ ბოლო დროს მიღებულ გადაწყვეტილებას “იმედის” და “პოსტვ”-ს წინააღმდეგ სანქციების დაწესების შესახებ; მოუწოდებს ევროკავშირის ინსტიტუტებს, გადახედონ ასეთი მედიასაშუალებების აკრედიტაციას ევროკავშირის ინსტიტუტებში და მოუწოდებს ევროკავშირის წევრ სახელმწიფოებს, მიჰყვნენ გაერთიანებული სამეფოს მაგალითს და მიიღონ შესაბამისი და პროპორციული შემზღუდველი ზომები იმ პირებისა და ორგანიზაციების წინააღმდეგ, რომლებიც პასუხისმგებელნი არიან ამ დეზინფორმაციული კამპანიების ორგანიზებასა და დაფინანსებაზე, მათ შორის ევროკავშირის გლობალური ადამიანის უფლებების სანქციების რეჟიმის ფარგლებში. დოკუმენტი მოუწოდებს ევროკავშირის სანქციების სიაში შეიყვანონ საქართველოს ეროვნული კომუნიკაციების კომისიისა და საზოგადოებრივი მაუწყებლის ხელმძღვანელობის წევრები”, — წერია რეზოლუციაში. როგორც იურისტი და სახალხო დამცველის ყოფილი მოადგილე გიორგი ბურჯანაძე წერს, 20-გვერდიან რეზოლუციაში “მოთხოვნილია პოლიტპატიმრების გათავისუფლება, ივანიშვილის და მისი რეჟიმის წარმომადგენლების სანქცირება და არჩევნებისთვის საჭირო პირობების შექმნა”. “რამდენიმე წუთის წინ ევროპარლამენტმა მიიღო უმნიშვნელოვანესი და ძალიან კრიტიკული რეზოლუცია და ანგარიში საქართველოზე. 20-გვერდიან რეზოლუციაში დაგმობილია ყველა ადამიანის უფლების დარღვევა, პოლიტიკური დევნები და პარტიების აკრძალვები, ყველა დრაკონული “ზაკონი”, ჭიათურის ეკოლოგიური პრობლემები, ქოლცენტრები, ირანის და ჩინეთის გავლენები და უამრავი სხვა რამ.ევროპარლამენტი არის ის ორგანო, რომელმაც ახალი წევრების მიღებას უნდა დაუჭიროს მხარი, შესაბამისად, კონსტიტუციის 78-ე მუხლის მიზნებისთვის ის უმნიშვნელოვანესია.ევროპარლამენტის რეზოლუციაში მოთხოვნილია პოლიტპატიმრების გათავისუფლება, ივანიშვილის და მისი რეჟიმის წარმომადგენლების სანქცირება, არჩევნებისთვის საჭირო პირობების შექმნა; ასევე ისინი არ აღიარებენ ქართული ოცნების მთავრობას და de facto-ს უწოდებენ ყველგან.რეზოლუციაში მოწოდებაა საქართველოს წინააღმდეგ სახელმწიფოთაშორისი დავის წარმოების თაობაზე.რაც ჩემთვის ძალიან გულსატკენი იყო, პირველად ისტორიაში მოწოდება არის სახალხო დამცველისადმი, რომ თავისი მანდატის განხორციელება გააძლიეროს, შეწყვიტოს შერჩევითი მიდგომები; და მიმართოს ხოლმე ეუთო/ოდირს რეპრესიული კანონების თაობაზე დასკვნების მისაღებად”, — წერს იურისტი, სახალხო დამცველის ყოფილი მოადგილე გიორგი ბურჯანაძე სოციალურ ქსელში. შეგახსენებთ, რომ ევროპარლამენტის საგარეო საქმეთა კომიტეტმა (AFET) საქართველოსთან დაკავშირებით ანგარიში მაისში დაამტკიცა. სანქციები და ივანიშვილის აქტივების გაყინვა — ევროპარლამენტის საგარეო საქმეთა კომიტეტმა ახალი კრიტიკული ანგარიში მიიღო