ევროკავშირის საგარეო-პოლიტიკური ლიდერი კაია კალასი ამბობს, რომ 11 მაისს EU-ს სახელმწიფოთა საგარეო მინისტრები შეთანხმდნენ სანქციებზე — სამიზნეა მოძალადე ისრაელელი ახალმოსახლეები მდინარე იორდანეს დასავლეთ სანაპიროზე და მათი მხარდამჭერი ორგანიზაციები, ასევე პალესტინური ჯგუფის ჰამასის მაღალჩინოსნები. „დროა ჩიხიდან მოქმედებაზე გადავიდეთ. ექსტრემიზმს და ძალადობას შედეგები მოჰყვება,” — დაწერა კალასიმ X-ზე.

სანქციების პაკეტი მიმართულია სამი ახალმოსახლისა და ოთხი ორგანიზაციის წინააღმდეგ — მათი სახელები ჯერ არ გამჟღავნებულა. ამ გადაწყვეტილებას თვეების განმავლობაში ბლოკავდა უნგრეთის მთავრობა, რომელიც გასული თვის არჩევნებში დამარცხდა.

ისრაელის საგარეო მინისტრი გიდეონ საარი სანქციებს მკაცრად აკრიტიკებს: მიუღებელია ახალმოსახლეებისა და ჰამასის წევრების ერთ სიაში მოხვედრაო. EU-ის ოფიციალური პირის განმარტებით, ჰამასის სანქციები რამდენიმე ქვეყნის პირობა იყო ახალმოსახლეებზე შეთანხმებისთვის.

დასავლეთ სანაპიროზე 500 ათასამდე ისრაელელი ახალმოსახლე ცხოვრობს — მათი რიცხვი ყოველ წელს იზრდება, ასევე — ძალადობრივი შეტაკებები ახალმოსახლეებსა და პალესტინელებს შორის.