ევროკავშირის საბჭომ სანქციები დააწესა კიდევ 16 ფიზიკური და 7 იურიდიული პირის წინააღმდეგ, რომლებიც „პასუხისმგებელნი არიან უკრაინის ტერიტორიული მთლიანობის, სუვერენიტეტისა და დამოუკიდებლობის შემლახველ ქმედებებზე.”

შეზღუდვების სიაში შეყვანილ პირებს ეკისრებათ პასუხისმგებლობა უკრაინელი ბავშვების სისტემატურ, უკანონო დეპორტაციაზე, იძულებით ასიმილაციასა და უკანონო გაშვილებაზე.

სანქციები შეეხო რამდენიმე საბავშვო ბანაკს — „ორლიონოკს”, „ალიე პარუსასა” და „სმენას”, — რომლებიც, ევროკავშირის განცხადების თანახმად, უკრაინელი ბავშვებისთვის ახორციელებენ პრორუსული ინდოქტრინაციის პროგრამებს. გარდა ამისა, შეზღუდვები ვრცელდება ანექსირებულ ყირიმში მდებარე ნახიმოვის სამხედრო-საზღვაო სასწავლებელზე, ДОСААФ-ის ცენტრზე სევასტოპოლში და სამხედრო კლუბ „პატრიოტზე” — ეს სტრუქტურები ბრალდებულნი არიან „არასრულწლოვანთა ხელახალ აღზრდაში, იდეოლოგიურ დამუშავებასა და მილიტარიზაციაში.”

ევროკავშირის მონაცემებით, 2022 წლის თებერვლიდან, რუსეთის სრულმასშტაბიანი შეჭრის შემდეგ, დეპორტაციასა და იძულებით გადაადგილებას დაექვემდებარა 20 500-ზე მეტი უკრაინელი ბავშვი. ეს ბრიუსელი მოსკოვის ქმედებებს საერთაშორისო სამართლის სერიოზულ დარღვევად და „უკრაინული იდენტობის განადგურების” მიზნად მიიჩნევს.

რუსეთის ოფიციალური წარმომადგენლები ბრალდებებს უარყოფენ — საკუთარ ქმედებებს ჰუმანიტარულ ჟესტებად ან „ოკუპირებულ ტერიტორიებზე ინფრასტრუქტრის განადგურებამ გამოწვეულ აუცილებლობად” წარმოაჩენენ.

ეს საბჭოს 23-ე სანქციების პაკეტის ნაწილია, რომელიც კონკრეტულად ბავშვების დეპორტაციასა და ინდოქტრინაციაში მონაწილე პირებსა და სტრუქტურებს ეხება. საერთაშორისო სისხლის სამართლის სასამართლომ 2023 წელს ბავშვების გადაადგილებასთან დაკავშირებით სამხედრო ომბუდსმენ მარია ლვოვა-ბელოვასა და პრეზიდენტ ვლადიმირ პუტინს დაპატიმრების ორდერი გამოუწერა.