ევროკავშირმა დაგმო 23–24 მაისის ღამეს კიევსა და უკრაინის სხვა ქალაქებზე განხორციელებული რუსეთის მასირებული საჰაერო თავდასხმა. ბოლო მონაცემებით, 4 ადამიანი დაიღუპა, დაახლოებით 100 კი დაიჭრა. კიევის მერმა ვიტალი კლიჩკომ 2 დაღუპული და მინიმუმ 77 დაჭრილი დაადასტურა; უკრაინის პრეზიდენტი ზელენსკი კი ამბობს, რომ მხოლოდ დედაქალაქში დაახლოებით 30 შენობა დაზიანდა.

ევროკავშირის საგარეო პოლიტიკის ხელმძღვანელმა კაია კალასმა განაცხადა: „მშვიდობიანი მოქალაქეების წინააღმდეგ ტერორიზმი ძალის გამოვლინება არ არის — ეს სასოწარკვეთილების აქტია. ჩვენ მტკიცედ ვუჭერთ მხარს უკრაინას.” მანვე დასძინა, რომ ევროკავშირი „ამზადებს დამატებით დახმარებას უკრაინის საჰაერო თავდაცვის სისტემების გასაძლიერებლად”.

კალასის თქმით, ევროკავშირის საგარეო საქმეთა მინისტრები მომავალ კვირაში განიხილავენ, თუ როგორ გაზარდონ ზეწოლა რუსეთზე. „რუსეთი ბრძოლის ველზე ჩიხში შევიდა, ამიტომ ის უკრაინას ქალაქის ცენტრებზე მიზანმიმართული დარტყმებით ატერორებს”, — განაცხადა მან.

კვირას, რუსეთის თავდაცვის სამინისტრომ დაადასტურა, რომ „ორეშნიკის” ტიპის ბალისტიკური რაკეტა გამოყენებული იყო. კალასმა ეს „ბირთვული ომის ზღვარს მიახლოებულ უგუნურ თამაშად” შეაფასა — „ორეშნიკი” შექმნილია ბირთვული ქობინების გადასატანად.

22 მაისს, რუსეთის პრეზიდენტმა პუტინმა სტარობელსკში კოლეჯისა და საერთო საცხოვრებელი შენობის დაბომბვას ტერორისტული აქტი უწოდა და თავდაცვის სამინისტროს საპასუხო წინადადების მომზადება დაავალა. ამ ინციდენტში 20-მდე ადამიანი დაიღუპა.