ბრიუსელში 11 ივნისს ევროკავშირსა და საქართველოს შორის სავიზო დიალოგის პირველი შეხვედრა გაიმართა. ეს ევროკომისიის მიგრაციისა და საშინაო საქმეთა გენერალური დირექტორატის მოწვევით შედგა.

ინფორმაცია პირველად „რადიო თავისუფლების” ევროპის ბიუროს ხელმძღვანელმა რიკარდ იოზვიაკმა გაავრცელა, რომელმაც შეხვედრა „მნიშვნელოვნად” დაახასიათა — „განიხილება ვიზალიბერალიზაციის შესაძლო შეჩერება,” — დაწერა მან.

საქართველოს საგარეო საქმეთა სამინისტრომ განმარტა, რომ ევროკავშირის სავიზო რეგულაციის (EU) 2018/1806 მე-8e მუხლის მე-9 პუნქტის თანახმად, შეჩერების მექანიზმის მოქმედების პერიოდში ევროკომისია ვალდებულია შესაბამის ქვეყანასთან დიალოგი გამართოს.

შეხვედრაში მონაწილეობა მიიღეს საქართველოს საგარეო საქმეთა სამინისტროს საერთაშორისო სამართლებრივი, საკონსულო და დიასპორის საკითხების დირექტორატის წარმომადგენლებმა.