11 ივნისს ბრიუსელში ევროკომისია და საქართველო პირველად შეხვდებიან სავიზო რეჟიმის შეჩერების მექანიზმის ფარგლებში. „რადიო თავისუფლების” ევროპის ბიუროს ხელმძღვანელი რიკარდ იოზვიაკი X-ზე წერს, რომ „ეს მნიშვნელოვანი შეხვედრაა უვიზო რეჟიმის შესაძლო შეჩერების საკითხზე”.

ევროკავშირის სავიზო რეგულაციის ((EU) 2018/1806, მუხლი 8e(9)) თანახმად, შეჩერების მექანიზმის მოქმედების პერიოდში ევროკომისია ვალდებულია შესაბამის მესამე ქვეყანასთან დიალოგი დაიწყოს. ამ ვალდებულების შესასრულებლად ევროკომისიის მიგრაციისა და საშინაო საქმეთა გენერალური დირექტორატი საქართველოს მოიწვია.

ბრიუსელში „რადიო თავისუფლების” წყაროების ცნობით, ევროკავშირი ელოდება, რომ თბილისი „შესაფერის ადამიანს” გამოგზავნის — ისეთს, ვისთანაც კონსტრუქციული საუბარი შეეძლება. ეს მოლოდინი განპირობებულია 2025 წლის ნოემბრის უარყოფითი გამოცდილებით: ადამიანის უფლებებზე ყოველწლიური დიალოგი ჩაიშალა, რადგან ქართულ დელეგაციაში შედიოდა ევროკავშირის მიერ სანქცირებული პირი — შინაგან საქმეთა მინისტრის მოადგილე ალექსანდრე დარახველიძე.

ამჯერად ქართულ დელეგაციას საგარეო საქმეთა სამინისტროს საერთაშორისო სამართლებრივი, საკონსულო და დიასპორის საკითხების დირექტორატის ხელმძღვანელი გიორგი ტაბატაძე გაუძღვება.

ვის ხელშია გადაწყვეტილება

იოზვიაკის ცნობით, 2026 წლის დეკემბერში ევროკომისია ყოველწლიურ სავიზო ანგარიშს წარადგენს, ხოლო 2027 წლის იანვარში ევროკავშირის წევრი ქვეყნები კენჭს უყრიან საქართველოს უვიზო სტატუსის შეჩერების საკითხს. ამ გადაწყვეტილებისთვის ყველა 27 ქვეყნის თანხმობა საჭირო არ არის — კვალიფიციური უმრავლესობა საკმარისია.

6 მარტს ევროკომისიამ საქართველოს დიპლომატიური, სამსახურებრივი და ოფიციალური პასპორტების მფლობელებისთვის უვიზო რეჟიმი უკვე შეაჩერა.