ბათუმში, მუხრან ვახტანგაძის სახელობის სპორტის სასახლეში, საქართველოს ახალგაზრდული ოლიმპიური ფესტივალის ძიუდოს პირველ ჩემპიონად თბილისის გუნდი იქცა. დრამატულ ფინალში, სადაც 0:2-ს ჩამორჩებოდნენ, თბილისელებმა ქვემო ქართლი 4:2 დაამარცხეს.

გადამწყვეტი ეპიზოდი სერიის 5-ე პაექრობამ შექმნა — 3:2-ზე, მაშინ, როდესაც ქვემო ქართლელებს გათანაბრება შეეძლოთ, თორნიკე კოპალიანმა (+73 კგ) ჩინებული იპონით დაამარცხა ნიკოლოზ ძიძიკაშვილი და ყველა კითხვის ნიშანი მოხსნა.

ბრინჯაოს მედლებს შიდა ქართლი (4:2 სამეგრელო-ზემო სვანეთზე) და იმერეთი დაეუფლნენ — ამ უკანასკნელთ განსაკუთრებით მძიმე გამარჯვება ერგო. გუნდს 6 სპორტსმენიდან 3 ტრავმირებული ჰყავდა, ერთ-ერთი — მარიამ გორგოძე — სასწრაფო დახმარების ბრიგადამ კლინიკაში გადაიყვანა. მიუხედავად ამისა, დამატებით პაექრობაში იმერეთმა 4:3 სძლია აფხაზეთს.

ფესტივალი 17 სახეობას მოიცავს; ძიუდო იმ სიაში შედის, სადაც ყველა 12 რეგიონს ჰყავს გუნდი.