დიუშენის სინდრომის მქონე ბავშვების მშობლებმა განცხადება გაავრცელეს. შინაგან საქმეთა სამინისტრომ წერილობით შეატყობინა, რომ ბიძინა ივანიშვილის სოლოლაკის რეზიდენციასთან შეკრების ჩატარება ეკრძალებათ.

მშობლები კანონს ეყრდნობიან: ყოველ ოთხშაბათსა და პარასკევს 19:00 საათზე ივანიშვილის სახლთან ერთი კაცის ფორმატის — ანუ „შეკრების” სამართლებრივ განმარტებაში მოუქცეველ — საპროტესტო აქციებს გამართავენ. კვირა დღეს „დიუშენის მარში” გრძელდება. ყოველ ორშაბათს 17:00 საათზე ასევე მთავრობის ადმინისტრაციის წინ იკრიბებიან.

„ხელისუფლების უმოქმედობის ყოველი დღე უდროდ დაკარგული სიცოცხლეა”, — ნათქვამია განცხადებაში. მოთხოვნა ერთია: ბავშვების გადასარჩენად საჭირო მედიკამენტების ხელმისაწვდომობა.