დიუშენის სინდრომის მქონე ბავშვების მშობლებმა განცხადება გაავრცელეს, რომელშიც გამოხატეს მადლიერება საქართველოს კათოლიკოს-პატრიარქ შიო III-თან შეხვედრისთვის. მათ იმედი გამოთქვეს, რომ საქართველოს საპატრიარქოს შუამავლობით ხელისუფლება დარწმუნდება — დიუშენის სამკურნალო თანამედროვე პრეპარატები რაც შეიძლება მალე შემოვიდეს ქვეყანაში.

„საქართველოს ხელისუფლება კვლავ აგრძელებს თანამედროვე მედიკამენტების ან მათი მომწოდებელი კომპანიების ნეგატიურ ჭრილში წარმოჩენას. სინამდვილეში, ამ მედიკამენტების — ელევიდისის, ეგზონების გამოტოვების, ჯივინოსტატის, ვამოროლონის — ვარგისიანობა და უსაფრთხოება დადასტურებულია ამერიკული და ევროპული წამლების მარეგულირებელი სააგენტოების მიერ,” — ნათქვამია განცხადებაში.

მშობლები მულტიდისციპლინური გუნდის შექმნასა და პერიოდული გამოკვლევების დაფინანსებას დადებითად აფასებენ, თუმცა ხაზს უსვამენ: „ეს ნაბიჯები 2 წლის წინ უნდა გადაგმულიყო. ამ დაყოვნებამ ბევრი საზიანო შედეგი მოიტანა, მათ შორის — რამდენიმე ბავშვის გარდაცვალება.”

საპროტესტო გრაფიკი: მშობლები ყოველ ოთხშაბათსა და პარასკევს, 19:00 საათზე, ბიძინა ივანიშვილის რეზიდენციასთან ერთკაციან აქციას მართავენ (შეკრება შსს-ს წერილობითი მითითებით იქ ეკრძალებოდათ). ყოველ კვირა — „დიუშენის მარში” რუსთაველის მეტროდან კანცელარიამდე. 24 მაისს შეკრება გადაიწევს 2 საათით — 20:00-ზე. ყოველ ორშაბათს, 17:00 საათზე, სახელმწიფო კანცელარიის წინ.

მშობლები ხელისუფლებას სასწრაფო მოლაპარაკებების დაწყებასა და მედიკამენტების ოფიციალური სქემებით შემოტანას ითხოვენ.