„ერთი მილიონი! თანხა, რომელიც შეუძლებლად ჟღერს. თანხა, რომელიც ქართველმა ხალხმა სიყვარულით, ერთობით და სოლიდარობით შეაგროვა,” — წერენ „დაიცავი ილიაუნის” მარათონის სტუდენტ-ორგანიზატორები.

„თითოეული ლარი, რომელიც ჩაირიცხა, ეს იყო ქართველი ხალხის განცხადება, რომ ხელისუფლებამ ბავშვებს წამალი უნდა ჩამოუტანოს. ახლაც, ამწუთასაც არ ჩერდება ჩარიცხვები — ზოგი 1 ლარს, ზოგი 35 თეთრს, ანუ ბოლო თეთრებს რიცხავს,” — ამბობს მარათონის ინიციატორი ლაშა ჯანჯღავა.

სტუდენტები ხელმოწერებსაც აგროვებენ და ქუჩაშიც ჩართულები არიან — თბილისშიც და რეგიონებშიც. 23 მაისს ახალგაზრდების ნაწილი ქობულეთში ჩავიდა დიუშენის სინდრომის მქონე ერთ-ერთი ბავშვის დაბადების დღის მისალოცად.

მარათონს სხვა ქვეყნებში მყოფი ქართველი ემიგრანტებიც, მცირე ბიზნესის მფლობელებიც და ცალკეული მოქალაქეებიც უერთდებიან. სახელმწიფო კი FDA-სა და EMA-ს მიერ სერტიფიცირებულ მედიკამენტებს „ფარმაცევტულ მაფიასთან” აკავშირებს. პრემიერმა კობახიძემ 19 მაისს განაცხადა, რომ „ხალხის ფული” ასეთ პრეპარატებზე ვერ დაიხარჯება.

სანამ ეს დავა გრძელდება, ბრიტანეთის NHS-მა Givinostat პრეპარატი სახელმწიფო პროგრამაში ჩართო — 530-ზე მეტი პაციენტი ამ გზით მკურნალობის შესაძლებლობას იღებს. დიუშენის კუნთოვანი დისტროფია 2-5 წლის ასაკიდან პროგრესირებს, 10 წლის ასაკში კი ბავშვს სიარულის შესაძლებლობას ართმევს.