6 ივნისს სანქტ-პეტერბურგსა და სხვა რუსულ რეგიონებზე უკრაინული დრონებით თავდასხმები განხორციელდა. ლენინგრადის ოლქში, კრონშტადტში ხანძარი გაჩნდა საზღვაო-საბრძოლო ფლოტის მე-15 არსენალის სიახლოვეს.

პეტერბურგის გამგებელმა, ალექსანდრ ბეგლოვმა, თავდასხმა დაადასტურა და ქალაქის მცხოვრებლებს სახლებში დარჩენა მოუწოდა. ბეგლოვის ცნობით, სამი ადამიანი დაშავდა, რომლებიც მოგვიანებით გაწერეს.

ლენინგრადის ოლქის გუბერნატორმა, ალექსანდრ დროზდენკომ, განაცხადა, რომ რეგიონის თავზე 141 დრონი ჩამოაგდეს. რუსეთის თავდაცვის სამინისტრო კი ამბობს, რომ ღამის განმავლობაში 200-ზე მეტი საფრენი აპარატი გაანადგურეს.

დარტყმები ასევე განხორციელდა კრასნოდარის ოლქსა და დონეცკის ოლქის რუსეთის კონტროლის ქვეშ მყოფ მარიუპოლის პორტში.

უკრაინის პრეზიდენტმა, ვოლოდიმირ ზელენსკიმ, დარტყმები დაადასტურა — კერძოდ კრონშტადტზე, პეტერბურგის არსენალსა და უსტ-ლაბინსკის სანავთობო ბაზაზე, სადაც ხანძარი გაჩნდა. „დროა ომი დასრულდეს. მაგრამ რუსეთი ომს მაინც აგრძელებს — ამიტომ მოქმედებს უკრაინური სამხედრო პოლიტიკა” — დაწერა ზელენსკიმ.

ბოლო კვირაში ეს პეტერბურგზე მეორე დარტყმაა. პირველი 3 ივნისს განხორციელდა — სანქტ-პეტერბურგის ეკონომიკური ფორუმის გახსნის დღეს, რომელშიც თავად ვლადიმირ პუტინი მონაწილეობდა.