დიუშენის კუნთოვანი დისტროფიის მქონე ბავშვების მშობლებმა 1 ივნისს ბიძინა ივანიშვილს ღია წერილი გაუგზავნეს. ორ წელზე მეტია, ისინი ცდილობენ, სახელმწიფოს ხმა მიაწვდინონ — რათა მათ შვილებს ჰქონდეთ წვდომა თანამედროვე მედიკამენტებსა და მკურნალობაზე.

„ბატონო ბიძინა, მოგმართავთ დიუშენის კუნთოვანი დისტროფიით დაავადებული ბავშვების მშობლები — ადამიანები, რომლებიც ყოველდღიურად ვუყურებთ, როგორ პროგრესირებს მძიმე დაავადება ჩვენი შვილების ორგანიზმში,” — ნათქვამია წერილში.

მშობლები წერენ, რომ ორ წელზე მეტია, ჯანდაცვის სამინისტროსა და მინისტრს მიმართეს არაერთხელ, თუმცა კონკრეტული გადაწყვეტილება ვერ მიიღეს. ამ დრომდე არ შესრულებულა ერთ-ერთი ყველაზე ძირითადი მოთხოვნაც — დიუშენით დაავადებული პაციენტებისთვის მულტიდისციპლინური სამედიცინო გუნდის შექმნა. ამ პერიოდში „ზოგმა ბავშვმა სიცოცხლეც დაკარგა.”

„დღეს უკვე 41 დღეზე მეტია, რაც მშვიდობიანად და ღირსეულად ვდგავართ ქუჩაში იმ იმედით, რომ ხელისუფლების რომელიმე წარმომადგენელი მოისმენს ჩვენს სათქმელს. ამ დრომდე არცერთი მაღალი თანამდებობის პირი არ შეგვხვედრია,” — განაცხადეს მშობლებმა.

სიმბოლურად, წერილი 1 ივნისს, ბავშვთა დაცვის საერთაშორისო დღეს გამოაქვეყნეს. მშობლები ივანიშვილს — მმართველი პარტიის საპატიო თავმჯდომარეს — პირდაპირ მიმართავენ, ვინაიდან მიიჩნევენ, რომ „ქვეყნისთვის მნიშვნელოვან გადაწყვეტილებებზე საბოლოო გავლენა სწორედ მას აქვს.”

„ჩვენ არ ვითხოვთ პრივილეგიას — ვითხოვთ შანსს. შანსს, რომ დიუშენით დაავადებულ ბავშვებს საქართველოშიც ჰქონდეთ იმედი, რომ მათი სიცოცხლისა და ჯანმრთელობისთვის ბრძოლა სახელმწიფოსთვისაც ისეთივე მნიშვნელოვანია, როგორც მათი ოჯახებისთვის,” — ნათქვამია ღია წერილში.

ამჟამად დიუშენის მქონე ბავშვების მშობლები კანცელარიასთან 42-ე ღამეს ათენებენ, თანამედროვე მედიკამენტებზე წვდომის მოთხოვნით.