11 ივნისს ბრიუსელში გამართული შეხვედრის შემდეგ საქართველოს საგარეო საქმეთა სამინისტრომ განაცხადა: ევროკომისიის გადაწყვეტილება საქართველოს დიპლომატიური და სამსახურებრივი პასპორტის მფლობელებისთვის უვიზო რეჟიმის შეჩერების შესახებ „არასაკმარისი დასაბუთების საფუძველზეა მიღებული და უსამართლოა”.

სამინისტრო განმარტავს, რომ ევროკომისიის ანგარიში, რომელსაც ეს გადაწყვეტილება ეფუძნება, „ტენდენციურად აფასებს საქართველოში არსებულ ვითარებას” და არ იძლევა „სათანადო და ობიექტური დასკვნების” საშუალებას.

შეხვედრაზე საქართველოს მხარემ ხაზი გაუსვა, რომ კონსტიტუცია და კანონმდებლობა გამოხატვის, შეკრების, გაერთიანების, პირადი ცხოვრებისა და თანასწორობის უფლებებს იცავს. ასევე ნახსენები იყო, რომ 2024 წლის საპროტესტო ღონისძიებების დაშლასთან დაკავშირებით სამართალდამცავებისგან უფლებამოსილების გადამეტების ბრალდებით ამჟამად 5 პირი დაკავებულია.

სამინისტრომ კიდევ ერთხელ გამოხატა „ევროკავშირთან ურთიერთპატივისცემაზე, თანასწორობასა და საერთო ინტერესებზე დაფუძნებული კონსტრუქციული თანამშრომლობის გაგრძელების მზაობა” და ხაზი გაუსვა „მაღალი დონის პოლიტიკური დიალოგის მნიშვნელობას”.

ევროკომისიის პრესსპიკერ მარკუს ლამერტის განმარტებით, შეხვედრა „ტექნიკური და პროცედურული ხასიათის” იყო — სტანდარტული ნაბიჯი, რომელიც ავტომატურად მაშინ იწყება, როდესაც სავიზო შეჩერების მექანიზმი ამოქმედდება. „შეხვედრის მიზანია, გამოსწორდეს გარემოებები, რომლებმაც უვიზოს შეჩერებამდე მიგვიყვანა,” — განაცხადა ლამერტმა.

ევროკომისიამ საქართველოს სამი კატეგორიის პასპორტის მფლობელებისთვის უვიზო რეჟიმი 2026 წლის 6 მარტს შეაჩერა.