“ტორპედომ” კონფერენსლიგამდე საქართველოს სუპერთასი მოიგო და მოთამაშეები იმედოვნებენ, რომ ამ პოზიტიურ განწყობას ევროთამაშებშიც შეინარჩუნებენ. “იბერიასთან” ფინალურ დაპირისპირებაში გადამწყვეტი პენალტი დიეგო დეისაძემ გაიტანა. ქუთაისის “ტორპედოს” თავდამსხმელი “ზირასთან” მატჩამდეც იმედიანადაა განწყობილი…

• გვიხარია სუპერთასზე გამარჯვება, რადგან ტიტულთან ერთად, ძალიან კარგი ემოციები მოგვიტანა. დიდი პატივისცემა “იბერიას”, რომელმაც კარგი თამაში აჩვენა. ორივე გუნდმა ვიბრძოლეთ. ასეთ მატჩში მოპოვებული ტიტული უფრო საპატიოა.

• ასეთი ტურნირი ევროტურნირებამდე რამდენად მნიშვნელოვანია?

• ძალიან მნიშვნელოვანია, რადგან გამარჯვებით დიდი მუხტი მივიღეთ. ევროტურნირი მოგვიახლოვდა და აზერბაიჯანში მნიშვნელოვანი თამაში გვაქვს. უკვე ამ მატჩისთვის ვემზადებით და ყველაფერს გავაკეთებთ, რომ საქართველოს სახელით ღირსეულად ვითამაშოთ.

• როგორი მოლოდინები გაქვთ?

• ფიზიკურად და მენტალურად კი ყველანი მზად ვართ. ევროთასებზე გამოსვლა დიდი მოტივაციაა. ვფიქრობ, ეს მუხტი კონფერენსლიგაზეც გაგვყვება.

• ქართული გუნდების მეტოქეებს შორის “ზირა” ყველაზე ძლიერია, მაგრამ მადრიდის “რეალიც” არაა და ცოტა ზედმეტად ხომ არ ვაფასებთ?

• “რეალი” არ არის, მაგრამ ყველა მეტოქე დასაფასებელია. მე პირადად ამ გუნდის რამდენიმე თამაშს ვუყურე და დავრწმუნდი, რომ კარგი მეტოქეა. მთავარია, ვიბრძოლოთ და კარგი თამაში ვაჩვენოთ. წინასწარ ვერაფერს დაგპირდებით, მაგრამ ეს ნამდვილად შემიძლია ვთქვა - ყველა ფეხბურთელი მოედანზე მაქსიმუმს დადებს, რომ ქუთაისი და საქართველო გავახაროთ.

• პოლონეთის ექსტრაკლასას შემდეგ საქართველოს ჩემპიონატში რას ხედავ ისეთს, რისი გამოსწორებაც ყველაზე მეტად გინდათ?

• პოლონეთში საკმაოდ ბევრი წელი გავატარე… რა თქმა უნდა, მათი ჩემპიონატში შედარებით მაღალი დონეა. მაგრამ რაღაც ასპექტებში საქართველოს ლიგა სჯობია.

• მაგალითად…

• ტექნიკით და აზროვნებით. მაგრამ იქ უფრო მაღალია თამაშის ტემპი და ინტენსივობა.

• საქართველოში დაბრუნება საკმაოდ სარისკო ნაბიჯია. თუმცა, მეორე მხარესაა თქვენი მშობლიური ქალაქი და მისი ამბიციური გუნდი - ეტყობა ამან გადაწონა…

-რა თქმა უნდა! ჩემი ქალაქისადმი სიყვარული ბევრს ნიშნავს. ამავე დროს, პოლონეთში იმდენ სათამაშო დროს ვერ ვიღებდი, რაც მჭირდებოდა. ამ ყველაფერმა დაბრუნება გადამაწყვეტინა და ამით ძალიან მოხარული ვარ.

შეგახსენებთ, რომ ქუთაისის “ტორპედო” კონფერენსლიგის პირველ საკვალიფიკაციო ეტაპზე აზერბაიჯანულ “ზირას” დაუპირისპირდება. ქუთაისური გუნდის საშინაო და გასვლითი მატჩების ტრანსლაციას Silk Universal უზრუნველყოფს. პირველი შეხვედრა 8 ივლისს სუმგაითში გაიმართება, ხოლო საპასუხო - 16 ივლისს ქუთაისში.