საქართველოში გასულ კვირაში ერთ პირს დენგეს ვირუსი დაუდასტურდა. ეს ინფორმაცია იაშვილის სახელობის ბავშვთა ცენტრალური საავადმყოფოს სამედიცინო დირექტორმა ივანე ჩხაიძემ გამოაცხადა.

დენგეს ვირუსი (DENV) კოღოს კბენით ვრცელდება და ოთხი სეროტიპად — DENV-1, DENV-2, DENV-3 და DENV-4 — არსებობს. ინკუბაციური პერიოდი 4–10 დღეა. დაავადება ძირითადად ვლინდება ცხელებით, ძლიერი თავის, კუნთებისა და სახსრების ტკივილით, ასევე გამონაყარით.

ინფიცირებულთა უმეტესობა მსუბუქად ან სიმპტომების გარეშე გადაიტანს დაავადებას, 1–2 კვირაში გამოჯანმრთელდება. თუმცა ყოველ 20-ზე დაახლოებით ერთ შემთხვევაში ვითარდება მძიმე ფორმა, რომელსაც სიცოცხლისთვის საშიში გართულებები — სისხლდენა, ცირკულატორული შოკი — ახლავს. სასწრაფო სამედიცინო დახმარება საჭიროა ძლიერი მუცლის ტკივილის, ჩაუნელებელი ღებინების, ცხვირ-ღრძილებიდან სისხლდენისა და სწრაფი სუნთქვის შემთხვევაში.

დენგეს ვირუსის სპეციფიკური ანტივირუსული პრეპარატი არ არსებობს — მკურნალობა სიმპტომურია: ჰიდრატაცია და ტკივილის მართვა. ვაქცინა ხელმისაწვდომია ზოგიერთ ენდემურ ქვეყანაში, თუმცა ხელმისაწვდომობა და გამოყენების სახელმძღვანელო პრინციპები რეგიონის მიხედვით განსხვავდება.

ინფექციური დაავადებების ექსპერტი პაატა იმნაძე ადრე განმარტავდა, რომ საქართველოში დენგეს ეპიდემიის განვითარების რეალური რისკი არ არსებობს — ვირუსის ჩამოტანა სხვა ქვეყნიდან ჩამოსვლის გზით კი შესაძლებელია.