საქართველოს ყოფილი ეკონომიკის მინისტრი ლევან დავითაშვილი SOCAR-ის საკუთრებაში მყოფი იტალიური ნავთობკომპანიის Italiana Petroli (IP) აღმასრულებელ დირექტორად დაინიშნა. SOCAR-მა IP-ის სააქციო კაპიტალის 99.82% შეიძინა — სწორედ ამ ტრანზაქციის დასრულების შემდეგ გამოქვეყნდა დანიშვნის ამბავი.

IP-ის 13 მაისის პრესრელიზის მიხედვით, დავითაშვილი კომპანიის საქმიანობას იტალიაში უხელმძღვანელებს და ყურადღებას გაამახვილებს „ოპერაციული უწყვეტობის უზრუნველყოფაზე, ეროვნულ ენერგობაზარზე პოზიციის შენარჩუნებასა და SOCAR ჯგუფში ინტეგრაციის ზედამხედველობაზე”. კომპანიამ ასევე აღნიშნა, რომ დავითაშვილი ფლობს იტალიურ ენას და 25 წელზე მეტი გამოცდილება აქვს საჯარო და კერძო სექტორის მაღალ თანამდებობებზე.

დავითაშვილი 2022–2025 წლებში საქართველოს ეკონომიკის მინისტრი და ვიცე-პრემიერი იყო. 2025 წლის ნოემბრიდან SOCAR-ის პრეზიდენტის მრჩევლის თანამდებობაც ეკავა.

იგი ასევე ხელმძღვანელობდა ყულევის ნავთობტერმინალის მმართველი კომპანიის — „ბლექ სი პეტროლიუმის” — სამეთვალყურეო საბჭოს. ყულევის ტერმინალი ბოლო პერიოდში ევროკავშირის სანქციებთან მიმართებით გახდა ყურადღების ცენტრი: EU-ს მე-20 სანქციების პაკეტში მისი ჩართვა განიხილებოდა, თუმცა საბოლოოდ ევროკავშირმა ეს გადაწყვეტილება არ მიიღო — „დადებითი ვალდებულებების” საფუძველზე.

2026 წლის თებერვალში სახელმწიფო უსაფრთხოების სამსახურმა დავითაშვილი გამოკითხვაზე გამოიძახა. სუს-ის განმარტებით, გამოკითხვა ერთ-ერთ ნავთობკომპანიასთან ხელშეკრულებასა და საქართველოს გაზმომარაგებასთან დაკავშირებულ რისკებს შეეხებოდა.