ანტვერპენში გამართულ ბელგიის ღია სამდღიან ჩემპიონატში, სადაც 13 ქვეყნის 500-ზე მეტი სპორტსმენი ჩაება, საქართველოს მოცურავეთა ნაკრებმა (მთავარი მწვრთნელი — ოლივერ სანგარია, ასისტენტი — დავით მურჯიკნელი) 9 მედალი მოიპოვა: 4 ოქრო, 4 ვერცხლი, 1 ბრინჯაო — და 15 ეროვნული რეკორდი დაამყარა.

ანა ნიჟარაძე — ოქრო და ეროვნული რეკორდი

ჩემპიონატის ყველაზე ნაყოფიერი სპორტსმენი ანა ნიჟარაძე გახდა: სამ დღეში მოიპოვა ოქრო, ორი ვერცხლი და 4 ეროვნული რეკორდი. ბოლო დღეს 100 მეტრი გულაღმა ცურვაში გაიმარჯვა (1:02.64) და ორჯერ გადაამეტა საქართველოს საკუთარ რეკორდს.

ნოე ფანცხავა — ისტორიული შედეგი

ნოე ფანცხავამ 50 მეტრი გულაღმა ცურვაში ოქრო მოიპოვა 25.01 წამით — შედეგი, რომლითაც FINA-ს 834 ქულა მოიპოვა. ეს დამოუკიდებელი საქართველოს ისტორიაში ყველაზე მაღალი მაჩვენებელია. 100 მეტრი გულაღმა ცურვაში 54.91 წამით გაასრულა — პირველი ქართველი მოცურავე, ვინც 55 წამზე ნაკლებ დროში ახერხებს ამ დისტანციის გადალახვას.

ანა კალანდაძე — 800 მეტრზე ვერცხლი (8:47.54), 400 მეტრზე ბრინჯაო (4:16.48) და საქართველოს რეკორდი.

ვაჟთა 4×100 კომპლექსური ესტაფეტა (ნოე ფანცხავა, ლუკა ერაძე, ანდრია ჩხიკვაძე, ანდრეა ფოლადაშვილი) — ოქრო და ეროვნული რეკორდი (3:48.89).

გოგონათა 4×100 ესტაფეტამ (ანა კალანდაძე, ანა ნიჟარაძე, ანასტასია მიქელაშვილი, ანა ივანოვა) ეროვნული რეკორდი 9 წამით გადაამეტა (4:20.68), თუმცა მე-4 ადგილი დაიკავა.