კომუნიკაციების კომისია “ტვ პირველს” “მაუწყებლობის შესახებ” კანონის დარღვევას კვლავ ედავება — ინფორმაციას “მედიაჩეკერი” ავრცელებს. მოხსენებითი ბარათის თანახმად, სადავო გახდა საინფორმაციო გამოშვებებში გამოყენებული არაერთი ფრაზა და შეფასება, მათ შორის: “სინდისის პატიმრები”, “პოლიციელთა ცრუ ჩვენებების საფუძველზე გასამართლებულები”, “ოლიგარქი”, “პოლიტპატიმრები”, “არარსებული დანაშაული”, “ბიძინა ივანიშვილის რეჟიმი”, “აქტივისტების ტერორი” და სხვა მსგავსი ფორმულირებები. კომისიის მედიამომსახურებების რეგულირების დეპარტამენტმა ტელეკომპანიის ეთერში 11-13 მაისს გასული საინფორმაციო გამოშვებების შერჩევითი მონიტორინგი ჩაატარა. უწყების შეფასებით, მაუწყებელმა დაარღვია “მაუწყებლობის შესახებ” კანონის 54-ე მუხლის მე-5 პუნქტი, რომელიც სამართლიანობისა და მიუკერძოებლობის სტანდარტს განსაზღვრავს. კომისიის განმარტებით, აღნიშნული ტერმინებისა და შეფასებების გამოყენებით საკითხები გაშუქდა არა ნეიტრალური და დაბალანსებული ფორმით, არამედ მაუწყებლის პირადი დამოკიდებულებისა და მოსაზრების გამოხატვით. კომისიამ დღევანდელ სხდომაზე “ტვ პირველის” მიერ კანონმდებლობის შესაძლო დარღვევის საკითხი განიხილა. საბოლოო გადაწყვეტილების გამოცხადება 25 ივნისისთვის არის დაგეგმილი. ცნობისთვის, კომუნიკაციების კომისიამ ტელეკომპანია “ფორმულა” 2 500 ლარით დააჯარიმა. კომისია ტელეკომპანიას მაუწყებლობის შესახებ კანონის იმ მუხლების დარღვევას ედავება, რომელიც შინაარსობრივ რეგულირებას გულისხმობს. კომისიის აზრით, ტელეკომპანიის მიერ “ოცნების სუსი”, “ივანიშვილის ხელისუფლება“, “პროსამთავრობო რუსთავი 2“, “რეჟიმის სასამართლო“ და სხვა მსგავსი ფრაზების გამოყენებით მაუწყებელმა ახალი ამბები პირადი დამოკიდებულების და მოსაზრების გავლენით გააშუქა. ComCom-მა ტელეკომპანია “ფორმულა” ₾2 500-ით დააჯარიმა