მიხეილ ჩხიკვიშვილს — „მანიაკ მკვლელობის კულტის” (Maniacs: Cult of Killing, MKY) ლიდერს — ნიუ-იორკის სასამართლომ 15 წლით თავისუფლების აღკვეთა მიუსაჯა. ამის შესახებ ინფორმაციას აშშ-ის იუსტიციის სამინისტრო ავრცელებს.

ჩხიკვიშვილი, ცნობილი „კაპიტანი ჯალათის” მეტსახელით, ხელმძღვანელობდა ნეონაცისტური იდეოლოგიის ექსტრემისტულ დაჯგუფებას, რომელიც ძალადობას ასახელებდა რასობრივ უმცირესობებზე, ებრაულ თემსა და სხვა „არასასურველ” ჯგუფებზე.

2022 წლის ივნისში ჩხიკვიშვილი ნიუ-იორკის შტატის ქ. ბრუკლინში გაემგზავრა. იქიდან Telegram-ის საშუალებით ჯგუფის წევრებს მასობრივი ძალადობისა და სიძულვილის ნიადაგზე ჩადენილ დანაშაულებს უბრძანებდა. ჩხიკვიშვილმა ასევე „მოძულეთა სახელმძღვანელო” გაავრცელა — მანიფესტი, რომელიც სკოლებსა და საჯარო ადგილებში სიმულტანური სროლებისაკენ მოუწოდებს.

განსაკუთრებით მძიმე ბრალდებებს შორის ისიცაა, რომ ჩხიკვიშვილმა სცადა ადამიანის დაქირავება, რომელსაც სანტა კლაუსის კოსტიუმი უნდა ჩაეცვა და უმცირესობების ოჯახების ბავშვებისთვის მოწამლული ტკბილეული დაერიგებინა.

„დღევანდელი განაჩენი ჩვენ ქუჩებს ურჩხულს მოაშორებს”, — განაცხადა ეროვნული უსაფრთხოების გენერალური პროკურორის თანაშემწემ ჯონ ა. აიზენბერგმა.

იუსტიციის სამინისტროს ცნობით, MKY-ი ნეონაცისტური იდეოლოგიის მიმდევარია და 2021 წლიდან ხელს უწყობდა ძალადობას, სისტემატურად მოუწოდებდა სკოლებში, ეკლესიებსა და სხვა ადგილებში ფართომასშტაბიანი სროლებისა და ტერაქტების განხორციელებისაკენ.