ნიუ-იორკში მასობრივი მკვლელობების ორგანიზებაში დამნაშავედ ცნობილ საქართველოს მოქალაქეს, მიხეილ ჩხიკვიშვილს, 15-წლიანი თავისუფლების აღკვეთა მიუსაჯეს. განაჩენი გამოაცხადა აშშ-ის იუსტიციის სამინისტრომ.

ჩხიკვიშვილი, ონლაინ-სივრცეში „კაპიტანი ჯალათის” სახელით ცნობილი, ნეონაცისტური ორგანიზაციის — „მანიაკური მკვლელობის კულტის” (Maniacs Murder Cult, MKY) — ლიდერია. დაჯგუფება ნეონაცისტური იდეოლოგიის მიმდევარია და ხელს უწყობს ძალადობას რასობრივი უმცირესობების, ებრაული თემებისა და სხვა „არასასურველ” ჯგუფებად მიჩნეულ ადამიანებზე.

ჩხიკვიშვილი მოუწოდებდა უდანაშაულო მოსახლეობის, მათ შორის ბავშვების, მკვლელობისკენ და ორგანიზებდა ებრაულ თემებსა და უმცირესობებზე თავდასხმებს. ერთ-ერთ ეპიზოდში ის ცდილობდა თანამშრომლის დაქირავებას, რომელსაც სანტა კლაუსის კოსტუმში უმცირესობების ოჯახების ბავშვებისთვის მოწამლული ტკბილეული უნდა დაერიგებინა.

„დღევანდელი განაჩენი ჩვენ ქუჩებს ურჩხულს მოაშორებს და ჩვენს თემებს, სულ მცირე, დროებით დაიცავს,” — განაცხადა ეროვნული უსაფრთხოების გენერალური პროკურორის თანაშემწემ ჯონ ა. აიზენბერგმა.

2022 წლის ივნისში ჩხიკვიშვილი ბრუკლინში ჩავიდა. 2022 წლის ივლისიდან Telegram-ის საშუალებით ახორციელებდა ძალადობის პროპაგანდას. MKY-ის მანიფესტი — „მოძულეთა სახელმძღვანელო” — მოუწოდებდა მასობრივი ძალადობის, მათ შორის სკოლებში სროლების, ჩადენისკენ. ბრალდებებით, დაჯგუფების წევრებმა მსოფლიოს მასშტაბით მრავალი თავდასხმა ჩაიდინეს.