ბრუკლინის ფედერალურმა სასამართლომ 22 წლის საქართველოს მოქალაქეს, მიხეილ ჩხიკვიშვილს — „მეთაური ყასაბის” ან „მიშკას” სახელით ცნობილს — 15 წლის თავისუფლების აღკვეთა შეუფარდა. სასამართლო ბრალი ედებოდა სიძულვილით მოტივირებული ძალადობის ორგანიზებასა და მასობრივი ძალადობრივი ქმედებების დაგეგმვაში, მათ შორის ბრუკლინში ახალი წლის ღამეს ბავშვებზე მოწამლული კანფეტების დარიგების გეგმაში — სანტა კლაუსის სახით გამოწყობილი პირის მეშვეობით.

ჩხიკვიშვილი „მანიაკი მკვლელის კულტის” ლიდერია — საერთაშორისო ნეონაცისტური ექსტრემისტული დაჯგუფებისა, რომელიც აშშ-ის იუსტიციის დეპარტამენტისა და ევროკავშირის მიერ ტერორისტულ ორგანიზაციად ცნობილია.

ჩხიკვიშვილი ასევე მიჩნეულია სხვა ძალადობრივი ქმედებების ინსპირატორად: 2025 წლის იანვარში ნეშვილის სკოლაში განხორციელებული სროლა, რომელშიც ერთი ადამიანი დაიჭრა და ორი — მათ შორის თავად დამნაშავე — დაიღუპა; ასევე 2024 წლის აგვისტოში თურქეთის ქალაქ ესქიშეჰირში მეჩეთის წინ დანით განხორციელებული თავდასხმა.

ჩხიკვიშვილი 2024 წლის ივლისში მოლდოვაში დააკავეს და 2025 წლის მაისში აშშ-ში გადაიყვანეს. 2025 წლის ნოემბერში მან დანაშაული აღიარა.