ბრუკლინის ფედერალურმა სასამართლომ ქართველ მოქალაქეს ჩხიკვიშვილს — ახლა 22 წლის — 15-წლიანი პატიმრობა მიუსაჯა „სიძულვილით მოტივირებული დანაშაულებისკენ წაქეზებისა” და „შხამიანი ნივთიერებებისა და ბომბების დამზადების ინსტრუქციების გავრცელების” ბრალდებით. სასამართლომ ოფიციალურად დაასახელა, რომ დანაშაული სიძულვილით — კერძოდ, ებრაელების, რასობრივი უმცირესობების, LGBT+ ადამიანებისა და ჟურნალისტების სიძულვილით — იყო მოტივირებული.

აშშ-ის იუსტიციის სამინისტროს ცნობით, ჩხიკვიშვილი — ცნობილი, როგორც „მეთაური ყასაბი”, „ყასაბი” და „მიშკა” — ხელმძღვანელობდა „მანიაკალური მკვლელობის კულტს” (MKU/MKY), რომელიც „თეთრი რასის უპირატესობის” მომხრე ორგანიზაცია იყო. ის მუდმივად მოუწოდებდა რასობრივ ნიადაგზე უდანაშაულო მოქალაქეების მასობრივ მკვლელობებს.

ბრალდება 2024 წელს, ჩხიკვიშვილის დაუსწრებლად, წაეყენა. 2025 წლის 22 მაისს ის მოლდოვიდან ამერიკაში ექსტრადირებული იქნა, ხოლო 2025 წლის 20 ნოემბერს — პატიმრობაში ყოფნისას — ბრალი აღიარა.

გეგმების ერთ-ერთი ყველაზე სასტიკი დეტალი ეხება ახალი წლის პერიოდს: ჯგუფის წევრს სანტა კლაუსის კოსტიუმი უნდა ჩაეცვა და ბავშვებისთვის შხამით გაჟღენთილი კანფეტები დაერიგებინა.

„დღევანდელმა გადაწყვეტილებამ ურჩხული მოაშორა ჩვენს ქუჩებს,” — განაცხადა 13 მაისს იუსტიციის სამინისტროს გენერალური პროკურორის მოადგილემ, ჯონ აიზენბერგმა.