Reuters-ი, წყაროებზე დაყრდნობით, იუწყება, რომ ჩინეთი სინძიანის უდაბნო რაიონებში — რუსეთისა და მონღოლეთის საზღვრებთან ახლოს — ბირთვული სტრატეგიული ძალებისთვის ინფრასტრუქტურის თავის თანამედროვე ისტორიაში უმსხვილეს კომპლექსს აშენებს.

ახალი ობიექტები შენდება ხამის ოლქის გამშვები შახტების გვერდით — ჩინეთის კონტინენტთაშორისი ბალისტიკური რაკეტების (ICBM) განლაგების ერთ-ერთ მთავარ ცენტრთან. ამ რაკეტებს აქვს აშშ-ის ტერიტორიაზე ჩაღწევის შესაძლებლობა. ანალიტიკოსების შეფასებით, ახალი ინფრასტრუქტურის მიზანია ჩინეთს შეუნარჩუნდეს საპასუხო დარტყმის უნარი მაშინაც კი, თუ მოწინააღმდეგე პირველ დარტყმას მიაყენებს.

Reuters-ის მონაცემებით, კომპლექსი მოიცავს 80-ზე მეტ ბეტონის სასტარტო მოედანს, სამ მსხვილ რვაკუთხიან ობიექტს, ათობით გამაგრებულ ბუნკერს, მიწისქვეშა კომუნიკაციებს, სარკინიგზო გზებს, აეროდრომებსა და იარაღის საწყობებს. ყველა ობიექტი ერთმანეთთან გზებისა და საინჟინრო ქსელით არის დაკავშირებული.

სამ რვაკუთხიან კომპლექსს ექსპერტები განსაკუთრებული ყურადღებით ათვალიერებენ: ანალიტიკოსების შეფასებით, შესაძლოა ისინი გამოყენებული იყოს მობილური სარაკეტო კომპლექსების, საჰაერო თავდაცვის სისტემებისა და სტრატეგიული ბირთვული ძალების მართვის ცენტრებისთვის.

პენტაგონის შეფასებით, ჩინეთი ამჟამად ყველა სხვა სახელმწიფოზე სწრაფად ზრდის ბირთვულ პოტენციალს. აშშ-ის თავდაცვის სამინისტროს დეკემბრის ანგარიშში ნათქვამია, 2030 წლისთვის ჩინეთის ატომური ქობინების რიცხვი 1000-ს მიაღწევს. ჩინეთი ასევე ავითარებს ადრეული გაფრთხილების სისტემა Huoyan-1-ს, რომელსაც 90 წამში შეუძლია ICBM-ის გაშვება დააფიქსიროს. ჩინეთის თავდაცვის სამინისტრომ Reuters-ის პუბლიკაციაზე კომენტარი არ გასცა.