საპროტესტო აქციაზე დაკავებული ზვიად ცეცხლაძის მამამ, ზურაბ ცეცხლაძემ, „პალიტრა ნიუსის” გადაცემაში „რეზიუმე” ეჭვი გამოთქვა, შეძლებს თუ არა ახალი პატრიარქი სინდისის პატიმრებისთვის ეფექტური ადვოკატობა.

„გამოვისმინეთ სხვადასხვა განცხადება. ფაქტობრივად, ითხოვენ, რომ პატიმრებმა არჩადენილი დანაშაული მოინანიონ — ასეთი შინაარსია ყველა გამოსვლაში. განსაკუთრებით ანდრია ჯაღმაიძის შემთხვევაზე: უკვე სამჯერ მიმართეთ და შედეგი არ მოჰყვა, ახლა კი „რაღაც პერიოდი” სჭირდებათ. ცალსახად ჩანს, რომ ახალი პატრიარქი ჯერ არ არის ის ავტორიტეტი, რომლის თხოვნამაც შეიძლება რაიმე შედეგი გამოიღოს,” — განაცხადა ცეცხლაძემ.

მისი თქმით, სასულიერო მიმართვა ხელისუფლებასთან მხოლოდ წინასწარი შეთანხმების პირობებში — რომ პატიმარს შეიწყალებენ — ღირს. „მიმართვა მიმართვისთვის, რომელიც შედეგს არ გამოიღებს, ეს სრულებითაც არ იქნება სწორი პატრიარქობის დასაწყისად,” — ამბობს ზვიად ცეცხლაძის მამა.

ქვეყანაში გადაწყვეტილებას საბოლოოდ პოლიტიკური ხელისუფლება იღებს და ცეცხლაძის განმარტებით, ეკლესიური მიმართვის ეფექტი მხოლოდ წინასწარ შეთანხმებულ სცენარში გამოჩნდება. „ქვეყანაში არ არის მოცემულობა, რომ ცვლილებები მზად იყოს,” — სკეპტიკურად აფასებს ის ვითარებას.