ბზიკები 12 მაისს ევროვიზიის საიუბილეო, 70-ე ფესტივალის პირველ ნახევარფინალში გამოვლენ — სამეული მე-6 ნომრად წარდგება. მარიამ კიკუაშვილი, გიორგი შიოლაშვილი და მარიამ თათულაშვილი, რომლებმაც საქართველოს საბავშვო ევროვიზიაზე პირველი გამარჯვება მოუტანეს 2008 წელს, ამჯერად გიგა კუხიანიძის საკონკურსო სიმღერით On Replay ასპარეზობენ.

კონკურსამდე ბოლო საათებია დარჩენილი, პროგნოზები კი სულ უფრო კაშკაშებს — განსაკუთრებით ბუქმეიკერების ნახევარფინალური ჩამონათვალი.

ბუქმეიკერები ბოლოდან მეორე ადგილს ანიჭებენ

ბუქმეიკერების რეიტინგში, სადაც ფსონების მიხედვით ყალიბდება შედეგი, საქართველო 14 ნახევარფინალისტს შორის ბოლოდან მეორე — 14-ე ადგილზეა. 6 მაისს, მეორე რეპეტიციის ვიდეო ნაწყვეტის გავრცელების შემდეგ, საქართველოს ფინალში გადასვლის ალბათობა 66%-იდან 32%-მდე ჩამოვიდა. ამ ეტაპზე ბზიკები მე-10 პოზიციიდან ჯერ მე-13-ზე ჩამოვიდნენ, შემდეგ კი — კიდევ ქვემოთ.

ბუქმეიკერებიც ცდებიან

ისტორია გვიჩვენებს, რომ ფსონების ცხრილი ხშირად ვერ ასახავს სცენის ენერგიას. 2024 წელს ლატვია ფინალში გადავიდა, მიუხედავად იმისა, რომ ნახევარფინალში ბოლო — მე-16 ადგილი ჰქონდა წინასწარ განჭვრეტილი. 2025 წელს პორტუგალიამ გამოიყვანა ფინალის საგზური, ბუქმეიკერებთან ასევე ბოლო — მე-15 ადგილზე ყოფნის მიუხედავად.

ფინალში გადასვლის წესი

წელს 35 ქვეყანა მონაწილეობს. ხუთი — მასპინძელი ავსტრია და „დიდი ოთხეული” (გაერთიანებული სამეფო, გერმანია, იტალია, საფრანგეთი) — ავტომატურად ხვდება ფინალში. საქართველოს ნახევარფინალში 14 ქვეყანა მონაწილეობს; ფინალში გადასვლის ბილეთი 10-ს ეწევა.

ხმის მიცემა წელს შეიცვალა: 2022 წლის შემდეგ პირველად, ფინალისტებს ჟიური და ტელემაყურებელი ერთობლივად გამოავლენს. ჟიური შვიდ წევრამდე გაიზარდა, ორი მათგანი 18–25 წლის ასაკის უნდა იყოს. ტელემაყურებელს ახლა ერთი ნომრიდან მაქსიმუმ 10 ხმა შეუძლია მისცეს — ადრინდელი 20-ის ნაცვლად.

ფანები ბზიკებს ფინალისტებს შორის ხედავენ

My Eurovision Scoreboard-ის მონაცემებით — ფანების ყველაზე გავრცელებულ სქორინგ-აპლიკაციაში — საქართველო 15 ნახევარფინალისტს შორის მე-7 ადგილზეა და ფინალისტად მოიაზრება. ევროვიზიის სპეციალიზებული გამოცემა Wiwibloggs ასევე ფინალისტად ასახელებს ბზიკებს და წელს ჩვენი გუნდი მის განსაკუთრებულ ათეულშიც მოხვდა.

სადაო გახდა სცენოგრაფია: ვიდეო ნაწყვეტში ჯგუფის წევრების კიბორგული „კლონები” ჩანს. ფანების ნაწილმა ეს AI-ით გენერირებულ ანიმაციად ჩათვალა; ჯგუფს მოუწია განემარტა, რომ ვიზუალური კონტენტი მთლიანად ადამიანების ნამუშევარია. სიმბოლური ამბავია: სიმღერა On Replay ხელოვნური ინტელექტისა და ადამიანის თანაარსებობის თემაზეა.

ევროვიზიის პირველი ნახევარფინალი თბილისის დროით 23:00 საათზე გაიმართება.