საქართველოს, აზერბაიჯანის და თურქეთის ოფიციალურმა პირებმა 2 ივნისს ბაქო-თბილისი-ყარსის განახლებული სარკინიგზო ხაზის ოფიციალური გახსნის ცერემონია გამართეს. 2017 წლიდან „სატესტო რეჟიმში” მომუშავე ხაზი ახლა სრულფასოვნად ამოქმედდა — ეს გადაწყვეტილება რეგიონში სატვირთო გადაზიდვებისა და ვაჭრობის მოცულობის სერიოზულ ზრდას უნდა მოჰყვეს.

ბაქო-თბილისი-ყარსის სარკინიგზო ხაზი დაახლოებით 850 კილომეტრს მოიცავს, საიდანაც 180 კილომეტრი საქართველოს ტერიტორიაზე გადის. სრული სიმძლავრით ამოქმედების შემდეგ მისი წლიური გამტარუნარიანობა 1 მილიონიდან 5 მილიონ ტონამდე გაიზრდება.

საქართველოს მონაკვეთის — მარაბდა-კარწახის 153-კილომეტრიანი მონაკვეთის — მოდერნიზაცია მოიცავდა ინფრასტრუქტურის რეაბილიტაციას, 27 კილომეტრის ახალი სარკინიგზო ხაზის გაყვანას, ოთხი ახალი და 15 რეაბილიტირებული ხიდის მშენებლობას, 13 ახალ სადგურს, 34 ესტაკადას, სასაზღვრო-სარკინიგზო გვირაბს თურქეთთან კავშირისთვის და ახალქალაქის საერთაშორისო სადგურს.

ცერემონიაზე „ქართული ოცნების” პრემიერ-მინისტრმა ირაკლი კობახიძემ პროექტს „ისტორიული მნიშვნელობა” მიანიჭა და „შუა დერეფნის განუყოფელ ნაწილად” მოიხსენია. მისი განცხადებით, 2017 წლიდან დღემდე სატესტო რეჟიმში ხაზმა 1.8 მლნ ტონაზე მეტი ტვირთი გადაზიდა, მათ შორის 90 ათასამდე კონტეინერი.

ოფიციალური გახსნის ცერემონიას ასევე ესწრებოდნენ: აზერბაიჯანის ციფრული განვითარებისა და ტრანსპორტის მინისტრი რაშად ნაბიევი, თურქეთის ტრანსპორტის მინისტრი აბდულქადირ ურალოღლუ და სომხეთის ინფრასტრუქტურის მინისტრი დავიდ ხუდათიანი.